Sunday, December 24, 2006

ينعاد عليكي

ينعاد عليكي...كل يلي بدي قولو موجود بالغنية
مع فرق كتير بسيط: سلامي "صار" معي





Monday, December 04, 2006

أشاير من وحي الغيب

صرلي يومين تلاتي مقلقز حاسس في شي بالأفق بس مش عم بعرف شو
وعادةً بجرب بحبـِش بقبـِش تا ولـَّنو آخدلي شي إشارة من شي محل بس ...
ما في شي...منشفي معي عالآخر... يا أنا معمي قلبي يا مش عم بفهم الأشاير
فاليوم قررت ما روح عالشغل وقررت إضهر من بيروت بركي بيروق راسي شوي وبسير شايف أو سامع أكتر
فدوَّرت هالسيارة وبلشت سوق ... بعد شي ساعتين سواقة وصلت عا مدينة كبيرة.
صفيت وإنزلت إتمشى بالسوق.
بعد شي نص ساعة، "محسوبكن" عـِطِش ... فِت عا دكانة زغيري وطلبت وحدة Diet Coke أنا وعم بتدفعلو شفت شغلة محطوطة ورا الدكنجي:
قلتلو: شو هيدا ؟
برم هيك وقلي : صبغة شعر
قلتلو: أكيد إنتي ؟
قلي: ولاو مية بالمية
قلتلو: فرجيني ياه تا شوف
قلي: تكرم عينك ...تفضل
يعني ما بعرف شو بدي قول بس بوضعي النفسي بهيديك اللحظة إعتبرتا إنو هيدي إشارة !!! أسود وسريع المفعول كمان ... الله ينجينا

ضهرت من المحل وبلش الفار يلعب بعبي ...

طلعت بالسيارة وبلشت سوق ... ما لحقت سقتلي شي خمس دقايق بطـَّلع هيك انا وعلقان بالعجقة وبلاقي الآرمة هيدي:


قلت إيه العمى بدينك شو أعمى إنو إذا بظرف خمس دقايق صار جاييك إشارتين يا إبن ألله وإنتي بعدك مُصِّر إنو بدو يصير شي ... خلص يا حبيبي ما في شي ... دوِّر ورجاع من مطرح ما جيت .... قاعد تتفلسف وتحلل وتناقش ... رجاع عالبيت وحاج تسمع أخبار لا من هول ولا من هوليك ... إتروك الأمور لإحساسك وحتى إشعاراً آخر إحساسك عم بقلك إنو الحالة "مأ..."

Tuesday, November 28, 2006

لفتة نـظر

الرسالة التالية هيي لفتة نظر لكل "الدكاترة الآكابر في علم الإجتماع والحضارات القديمة وجـِر" من يلي أتحفونا مبارح عا ساحة ساسين بمحاضرة عن حق الإختلاف بالرأي ومتشعبات الممارسات الديمو"قراطية"

ليكو...التاريخ ما بعيد نفسو...إنتبهوا منيح....التاريخ ما بعيد نفسو إنما الحمير أجلكن بيعملو نفس الأغلاط إنما بتواريخ مختلفة فا بيتهيألكن إنو التاريخ عم بعيد نفسو ... بس يا "حمير" بتكونو عم تعملو نفس الأغلاط تبع أهلكن أو جدودكن أو يلي هلق عم يستعملوكون حطب للموقدة !!! ما بعرف إزا حدا منكن سامع بالموقدة أو بالصوبيا عالحطب...

بس مش هون لفتة النظر. كبسوا PLAY وساعتا بتعرفو شو هيي لفتة النظر!!!







Saturday, November 25, 2006

وضعي النفسي حاليـًا

لمن يهمه الأمر، فيكن تاخدو فكرة عن وضعي النفسي حاليـًا بالإستماع إلى هذه "القطشة" ـ
هلق لَ يلي ما بيهمن الأمر، فيكن تضلو عم تحضروا نشرات الأخبار كل واحد منكن حسب لمين بـِزَقـِف

عشتم وعاش لبنان






ملاحظة: الأغنية مهداة لكل واحد في مسلة تحت باطو وعم بتبلـِش تنعرو...صحتين سلف.

Thursday, November 23, 2006

أغنيتي المـُفـَضَلة

أغنيتي المفضلة في كل زمان ومكان....إنجوي








Saturday, November 18, 2006

قلـّي و قلتـِلو

قلـّي: إنتي عوني ؟
قلتـِلو: إيه أنا عوني .... الكعكي !!! ومجلة "نادين" إنجيلي وقرآني

قلـّي: إنتي إشتراكي؟
قلتـِلو: أكيد ما أنا مجدد "إشتراكي" بمجلة نادين ... ما عم نحكي عربي!!!

قلـّي: طيب إنتَ مـُستقبلي ؟
قلتـِلو: إيه ... وإذا ضلـِت الأمور هيك مني عارف "مستقبلي" وين رح يكون؟؟؟

قلـّي: إنتي قواتي؟
قلتـِلو:Ou est tais toi

قلـّي: فإذاً إنتي حزب اللاوي
قلتـِلو: لا واللاوي

قلـّي: العمى بعرضك إنتو شو وليه؟
قلتـِلو: أنا مواطن عادي. كتير كتير عادي ... وليك، نحنا الأكترية المزبوطة إذا كنت ناسي لأنو نحنا كمان "لن ننسى"

Sunday, November 12, 2006

حلم ليلة ...خريف


بصرت بنومي إني علقان بقلب مسلسل مكسيكي !!! أنا والممثلين منتفاعل مع بعض. بيسمعوني وبيسمعون، بيحكوني وبيحكيون ...

Please ما تواخذوني على بعض التزفير يلي رح يمرق بس عم بنقلكن "وقايع" وبعدن بيكفي إنو واحد يسمع نشرات الأخبار المحلية وتصاريح الوزارا تا أكيد أحلامو ما رح تكون ولا شوي طاهرة !!!
مشهد 1: Don Alekhandro Delgado, Chermoutella, Chlikita

Don Alekhandro Delgado: تبّاً هؤلاء المزارعين الحقيرين يرفضون بيع أراضيهم، يجب أن أسيطر على جميع العقارات ....

تدخل Chlikita مذعورة وثيابها ممزقة ....

Don Alekhandro Delgado: ماذا جرى لكِ يا Chlikita ؟
Chlikita: إنه Don Tablo لقد مزَّق ثيابي وحاول أن يضاجعني !!!
Don Tablo Picasso : Don Alekhandro Delgado
Chlikita: أجل هو بنفسه
Don Alekhandro Delgado: ألم تدافعي عن نفسكِ وشرَفـُكِ ؟
Chlikita: حاولت ... لكنه أغواني هيهيهيهيهيهيييييي
Chermoutella: حااااااااااااا Chlikita إنك لـَحقاً إسمٌ على مسمى
Chlikita: (بكتير لئمنة) ومنذ متى يا ................ Chermoutella يغبرُ الطحان على الكلاس؟
أنا: (محاولاً ترطيب الأجواء)Annnnnhhh في عندكن كلاس بـ مكسيكو ؟
Chlikita و Chermoutella: إخرس أيها اللبناني اللئيم !!!
أنا: (بقلبي) إنشالله تموتي إنتي وياها بإنفلوانزا الطيور !!!

الحاج فتحي!!!: يا واد يا متوّلي دانا عايز أقلك على سر كتمتو عليك تلاتين سنا.... دانا مش أبوك .... أنا مراة خالك !!!!
أنا: ولك يا حااااااااااج عم نحضر مكسيكي شو جابك إنتي بنص هالحشرة ؟
الحاج فتحي: وانا مالي ؟ دانا بحب الفاهيتاس آوي !!!!
Don Alekhandro: حااااااااااااا Don Fat7ello وأنا أجد الفلافل الطعمية جدُ لزيزة !!!
الحاج فتحي: دانا ماشربشي إلا ألمازة ... بلا مواخزة يعني...دول اللبنانيا رايحين ساحبين الكحول من الـ Laziza ويبيعونا بيرة على فراولة وأناناس وميشميش...دانا "كونتي" بحب الميشميش ودي لوقتي بحب المانغا !!!
Don Alekhandro: آسف Don Fat7ello إنما مزارعي في مقاطعة Guadalakhara لا تزرع سوى الخرمى. لدينا خمسة ملايين شجرة خرمى ...
أنا: أكيد يا بابا ... لو ما كل هالخرمى قادرين تعملو مسلسل بـ 12698 حلقة!!!

وفجأة دار الراديو وإسمعت المذيعة عم بتقول إنو المتشاورين فشلوا يلاقو صيغة للحل بس عم بطمنونا كلنا إنو عازمينا إبتداءً من جمعة الجاي على نقفة دين أكلة "خرمى" من يلي بحبا قلبكن

صباح الخير وصحتين سَـلـَف .......

Saturday, November 11, 2006

أخطر سؤال

أخطر سؤال اليوم ببيروت، مش أمتين في نزلة عالشارع؟ أو مين عم يقصفنا بالإينرغا؟
لاء،
وكمان السؤال عن تخصيب الأورانيوم والملف النووي الإيراني وكيف السعوديي عم بدبوا وبيعصروا إذا إيران صار عندا القنبلة ...
لاء،
كل هالأسئلة ما فيا خطر عليك يا صاحبي ... الخطر المـُحدق فيك شخصياً هو لما توصل عليك مرتك أو صاحبتك وتسألك:
- حياتي ؟ شايفني نصحاني شوي ؟

يعني شو بدي قلك غير إنو توخى الحيطة والحذر لأنو الكلمات اللي بدك تقولا من بعد هالسؤال فيا تكون مصيرية بالنسبة لإلك ... وبقية حياتك ... لأنو ممكن كتير نقول "البقية بحياتك" لعيلتك وقرايبك... سلامة قلبك.

النصيحة هون إنك تـغـَّير الحديث مع إنو مش مضمونة هالإستراتيجية:
- يا حياتي عرفتي إنو إستقال رامسفليد ؟
- ليش عم بتغـَّير الحديث ؟ (والذعر بادي على وجـّا) والـ Panique رح تبلش تبدي عا وجّك ... (ما قلتلك مش مضموني هالإستراتيجية)

هلق في صيغة للسؤال أخطر من هيك على مقياس ريختر، لما بتوصل "السـِت" من الشغل مثلاً أو الجامعة و"مأنغرا" معا (ما كنت عارف إنو أصول كلمة مأنغرا هيي Angry) وبتسألك:
- ليك ؟ شايفني نصحاني شي ؟
(إنتبه إنو كلمة حياتي صارت "ليك" وناشفة وهال "شوي" يلي فيها وما فيها صارت "شي" ومشروطة ومأكدة وغير قابلة للنقاش)
النصيحة هون إنك تتوجه للطوابق السفلى، لأنو يا حبيبي بدك إتدوق "الواوا" ... وإياك ثم إياك تجيب سيرة هيفا قداما لأنو أكيد رح منروح ناخود بالخاطر ...

قمة الخطر برأيي المتواضع هو لما تكون راجعة من شي ضهرا مع صاحبتا وتشك عليك دغري وتروح سافقتك السؤال العجيب:
- ولـَكْ يا حياتي ليش ما قلتلي إني نصحاني هالقد ؟؟؟
إتروك كل شي من إيدك وإركض عالبلكون وشك عا راسك للباركينغ ... وإذا إنتو عايشين بالطابق الرابع أو الخامس ... مش مهم... تفاصيل هيدي... أنا بأكدلك إنو شو ما بدو يصيبك من بعد الشكة أهونلك بكتير من إنك تجابه هيك سؤال و"تداعياته" ... شو بدك... روح إقعدلك جمعتين تلاتي بغرفة العناية الفايقة وصلي إنـَّا ما تضلا "فايقة" تسألك هالسؤال من بعد ما ترجع عالبيت لفترة النقاهة.

حوار
هيي: طيب ما قلي شوي شو فيي أعمل...ما إنتا درستون هول بإميركا Food Science و Nutrition وشو بعرفني... إنصحني شوي ...
أنا: مش ناقصك نصاحة أأأه Sorry نصايح .......... آآآآآآآآآآخ
هيي: بلا زناختك ... بوجـّْعك ها !
أنا: OK OK أول شي خفيفيلي بطاطا مقلية .... عالترويقة !!! آآآآآآآآآآخ
هيي: جلدك عم يرعاك هيئتو ....
أنا: طيب لازم تتخلصي من الجرة
هيي: أيَّ جرة ؟
أنا: الجرة يلي كل ما دق الكوز فيا بتفتحليك لوح Galaxy ....
أنا: آآآآآآآآآآخ آآآآآآآآآآخ آآآآآآآآآآخ

Saturday, October 28, 2006

حـُطـَك عا حـَكي

ليك ... لشو كترت هالحكي كلو ؟؟؟
إنو شفتلك حداً حررّ بلد بالقرّادي ؟ غير زغلول الدامور ما حدا عـِمِلا بعد...
وليك... زغلول الدامور إلو من سنة الـ76 ما راح عالدامور...

ليك إسماع هالغنية وإسماع من يلي عم بتغنيـّا:
صار لازم تـِسكـُت يا عيني !!!

وعا فكرا يلي منكن ما بيعرف شو أو وين النورماندي
هيي مكب زبالة بيروت إيام الحرب وبعدنا لهلق منـََّضـِفْ فيا
لأنو كمان بدو يطلع فيا عمار Super Duper De Luxe
مبروك سلف لأنو بإذن الله وسوليدير ما رح يضل لبنانيي
ببيروت إلا جماعة الباركينغ و"السيكيوريتي" والمدحوشين
بـ Derriere السعوديي.

أبشر ...

الغنية إسما "إلى آخره"، العم بتغني إسما أميمة الخليل، يلي كتب إسمو محمد العبدالله ويلي لـَحَّن عبود السعدي.







Tuesday, October 24, 2006

في السياسات الوطنية و...الطبخ!!!ـ

نحنا شعب بحب بطنو. وأنا أول واحد. ومش عم إنتقد ولا لطـِّش. ما فيا شي عيب يعني إلا وقت إلي بيسيروا إجرينا يتفركشو بكـِرْشنا... بقا من هونيك ورايح بدا حلّ جزري (لاء، الحل الجزري مش كوكتيل عصير جزر. الحل الجزري ما إلو علاقة بالجزر أو عصيرو)ـ

هلق مؤخراً إتبيـَّنلي إنو في شي عيب كمان بما يخص الأكل أو الطبخ غير زيادة الوزن وهوي عم لاحظ كتير إنو سياسات بلدنا الوطنية أو الحكومية أو السوسيو أنتروبولوجية (يحرق إختا هيدي بتحرقلك شي 300 كالوري تاتقولا بس) مستوحات من الأكل أو الطبخ أو ما أشبه ذلك.

إتفضلوا... (عالطاولة... مش لـَجُوا... إلا إذا كانت الطاولة محطوطة جُوا!!!)

أولاً: في السياسة الدفاعية
أكيد ما بدا إتنين يحكوا فيا ... سياستنا الدفاعية كناية عن فنجان شاي. هلق هيدا بالعموميات بس سياستنا الدفاعية معقدة أكتر من هيك:

الدفاعات الأرضية منقدم شاي أسود سيلاني...سريلانكي يعني، عا أساس كلنا معلمين ومش فاضيين نحارب براً، وكل هالسريلانكيي شو عم يعملو؟ ينقبروا يعملو شاي !!!

الدفاعات الجوية، هاي أرقى وبدا عـِلـِم ودراسة... فا منضيـِّف شاي إنكليزي إسمو Earl Grey Tea. ما فيكن تتصوروا قديش فعـَّال هالشاي بالدفاع عن الجسورا ومحطات توليد الكهربا. للأسف كان مقطوع هالنوع الشاي بالذات تموز الماضي عا أساس صيفية وشوب والشاي بينشرَب بالشتي ...

الدفاعات البحرية، هيدي من زمان وجِّر منضيِّف زهورات وخبيّزي ... منيحا للإسهال عأساس ما في "إسهال" من إنك تغرقلنا أيَّ فلوكا للبحرية اللبنانية. بس بإذن الله إذا موسم الخبيّزي منيح سنة الجاي شو بدك... منيموم حاملة طائرات!!!

ثانياً: في سياسة إدارة الدين العام
يعني أقل ما يقال فيها إنو "بالرِزّ بصَل" يا خيي بعلمك كانو شي مليارين طن رزّ و"إز" بيزيدولون شي تمـِناوتلاتين مليار طن بصل وعملولنا بالرز بصل.

ثالثاً: في سياسة إلغاء الطائفية
طبخة بحص!!! وهاي تما نرجع ما قبل إتفاق الطايف أو إتفاق "قطايف" بقشطة محمضة ومعفنة.

رابعاً: في سياسة حماية البيئة
كبة نية مدقوقة بالجرن. والجرن ساحبينو من حيَّلا كسارة بالجمهورية اللبنانية... نقي وإستحلي... عاأساس في كسارات أكتر ما في مطربين والمدقة هيي مخططات الإنقاذ والبيئة المعترة شقفة لحمة هبرة علقانة بين مدقة المخططات الإنقاذية وجرن الكسارات...وكول يا معلم...بصحتك

خامساً: في سياسة وضع قانون عادل للإنتخابات
لبن إمو ورِزّ. مع إنو تا يكون عادل لازم تاخدو بلا رز خصوصي إذا الرز من تبعول رقم تنين فوق. بقا خلينا بس عاللبن إمو. بس كمان إنتبهت هلق إنو مش معروفي مين إمو لأنو حلاّ إتخـّلفو بقا ريتو يسلم لأمو.
وهون بس رح إضطر حيد عن موضوع الطبخ وفوت بموضوع المسبّات... وفي مسبة كتير بتلبق لَ هالقانون الإنتخابي منتركا لمخيلتكن بس مكوّني من كلمتين وتاني كلمة "إمو"...

سادساً: في سياسة "السيادة"
كان إلنا فترة متبعين سياسة البرازق. الظاهر إنو عملنا حساسية عالسمسم فا وصفولنا الهامبرغر والـ Escargot مدري الـcamembert.

بس في ناس يا خيي، أنا شفتون بعيني، كان الصحن مليان برازق وحطوا فوقن camembert ... والله العظيم. ونزلوا أكل كأنو ما صار شي. شو بدك نفِس قطـِّيعة أكتر من هيك؟ ألله سَتـَر وما حطوا الهامبرغر دغري... في أقرف من البرازق مع سلطة الملفوف والمايونيز؟

ليكو وليه... متل ما شايفكون وشايفيني...يا رح تبلشو تاكلو تبولة يا رح تجبرونا نطعميكون شي مش ولا البد...وبعدني مُصـِرّ خلـِّص هالبوست بالطبخ ومش بالمسبات !!!

Friday, October 20, 2006

لازم...سياسي

لازم دوري شمعون يعمل رئيس بلدية تيزي أوزو (مبلا مبلا بال"تي" مش بل "طه")
لازم يلاقولا حلي لَ نايلة معوض...وعالسريع بكون أفضل مشان أعصابنا كلنا
لازم فارس سعيد يسكت لأنو كل ما يفتح تِّمو عم بفوت "هوا"
لازم سمير فرنجية يعمل نايب عند البوليساريو...هول بالصحرا الغربية المتنازع عليها بين المغرب وإسبانيا
لازم مي شدياق تترك كل شي وتروح تعيش بعنايا وتتعبد لمار شربل وتترك السياسة وتشكر ربَّـا...
لازم الياس عطالله يرجع عالمخترة بالرملية لأنو أنا أكيد بضـّييع بطريق طرابلس
لازم الرئيس لحود يخفف برونزاج. صرنا بنص تشرين يا شيخ !!!
لازم رجال الدين يخففوا التعاطي بالدين ويركزوا أكتر عالسياسي بركي مناخود نتيجة لأنو بالدين بدّن بعد فتّ خـِبز
لازم بعض الصحافيي يلاقلون وظيفة تسند وظيفة الصحافة لأنو الأقلام المأجورة متل "توب العياري"
لازم بعض الجرايد تصارح هالكم واحد يلي بعدن بيقروا جرايد إنو إذا ما في متمولين سعوديي أو إيرانيي يدعموا ما فينا نطبع الجريدة! فا إنتوا وعم تقروا خدوا هالشي بعين الإعتبار
لازم نشرات الأخبار يكون فيا أقل لئمني وشي رشة موضوعية (إنو أنجأ عرفتوا كيف؟ عا أساس كترة الموضوعية بتنزع الطبخة)
لازم كلنا سوى نلاقيلنا شي طريقة يركب فيا البلد مش على Axe سعودي/فرنسي/أميركاني أو على Axe سوري/إيراني...أنا منـّي وعليي مستعد إركب عا خازوق بس يكون لبناني...

Sunday, October 15, 2006

قالـِت بحبـَك ........ـ

قالـِت بحبـَك
بس حُب جديد
ممنوع تلمسني
لـَمِس بالإيد

قـِلـْتِلها اللي
بيزرَعْ الكرمات
مجبور منها
يـُقطـُف عناقيد

قالـِت عـِند ما
بتقشع العنبات
غـِضّ النظرْ
وتفرَّج من بعيد

قـِلتلها بعنقودِك
الحـَبَّات
ما بـِترِكـُن غير
ما يصيرو نبيد

قالت أنا نحلِة
من النحلات
لا غِشْ في
عندي ولا تقليد

قـِلتـِلها الدبور
للعَسلات
مش رح يوفـِرهُن
لـِيوم العيد

قالت أنا بحبك
بلا غايات
قديش صَرلي
هالكلام بعيد

لا تـِغـّرْني
ولا تكبِّر الفـَشخات
ما فيك تـَعمِل
متل ما بـِتـْريد

قلتلها يا
مسَييجي الوردات
لو الميّ بدا
توقـَفْ عواميد

يما إسمَحيلي
فـَرفـِك الحَبقات
يما تركيني هيك
واعْفيني
من حُب لا بينفـَع
ولا بيفيد

من شعر زغلول الدامور

Wednesday, October 11, 2006

تُسائلُني

ولو عمّي...قلنالِك رجعنا نقرا شِعر
وإنو شي بفش الخلق...بس إسترسلنا
بفشة الخلق وإنسينا القصيدة يلي
ذكرتني بشفافِك...
بس ولا يهمِك
إلتقى مين يدافع عنِك
وينشر عرضي!!!ـ

بس كلو ما بيفيد لأنو مش فارقة عندي
ورح ضّل إقرا شِعر وفش خلقي
ويمكن إشتقلِك أو إشتاق لغيرك
وبرضو ما حدا خصو...........ـ

تُسائلُني

تُسائلُني حلوةُ المَبسمِ
متى أنت قبّلتني
في فمي؟

فقلتُ لها
سَلي شفتيكِ
بما حستاهُ
من شفتيَّ عاشقٍ
مُلهمِ

فقالت، وعضّت بشفتيّها
سأغمضُ عينيّْ
كي لا أرى
إن شئتَ في عُنُقي
أم شِئتَ في فمي
أم شِئتَ على فراشِ
حبيبٍ مُغرمِ

Friday, October 06, 2006

بصراحة...ـ


ليكي...بعرف إنو خْلِصنا
وبيناتنا ما بقا في شي...ـ
إلا صداقة تواعدنا إنو نخليها
وعارفين إنو ما رح نغذيها
صعبة الصداقة بعد علاقة غرام
لأنو الغرام ما بينسجم مع الصداقة

وأنا معِك يا ستي...إنو خِلِص الغرام
مدري خِلِص الحب ...ـ
في شي خِلِص أكيد ومني عارف شو هوي...ـ

بس بدِك للصراحة؟ـ
إشتقت لَ شفافِك

إشتقت لَ شفافِك
لأنو رجعت إقرا شِعِر
كان إلي زمان ما إقريت شِعِر
ويمكن ما بتعرفي إنو لما كنّا سوى
كنت إقرى شِعِر...تا إهرب مِنِك
ومن جَماعتِك...ومن مُجتمَعِك المُخملي
يلي كل هاللبنانيي طاحشين تا يصيروا منو
ومنن عارفين شو بيحوى...ـ
منن شايفين إنو ما في شي...ـ
فوفاش...ـ
في شوية مصاري...ـ
بس طِلِع عالساني شَعِر وأنا
قلِك إنو المصاري ما بتعمِل عالم!!!ـ

واللذة إنو كلكن اللهاويّي
وما بتأفوا قدّاس
ولا جناز ولا زيّاح
وما بتاكلو لحمة الجمعة
وسبع كنايس و تنعشر مزار
وستين ضربة سخنة...ـ
وما بتعبّروا شحّاد أو ولد عم بِ بيع "شيكلتس"ـ

ولِكْ بتعرفي...ـ
قفولكُن شي قداس
و"شِخّوا" عا إصبع مجروح!!!!!!!!!!!ـ

Monday, October 02, 2006

بدون تعليق

بدون تعليق...مع إنو بتحّمل كتير تعليق

Tuesday, September 26, 2006

مبارح شفتك

مبارح شفتك
وخلص كل شي
إمحينا دفاترنا
وسكّرنا الحساب
قلبك معِك يا حلوتي
وقلبي معي...ـ
لَ يلي منكن ما بيعرفوها...بعرّفكن عا ريما خشيش
الغنية إسما بكفّيني








Monday, September 25, 2006

من محاسن الصدف...ـ

كان عندي إجتماع اليوم ببيروت.
فِتّ بمدخل البناية وطلبت الـ Ascenseur

بس إنفتح الباب، طُلعِت بوجّي وراحت سافقتني هونيك:
- Yiiiiiiiiiiiiiiiiiiiiiiiiiiiiiiiiiiiiiiiiiiiiii
يا محلا صفارات الإنذار بـِ نهاريّا

وتابعت:
- شو ضعفاااااااااااااااااااااااااااااااان، عم تعمول Régime؟

عا وهلتي أنا، جاوبتا دغري:
- أستغفرُ الله العظيم من الشيطان الـ Régime
- ......................................................

مدري ليه، حسيتا ما فهمت شي ....

Sunday, September 17, 2006

مش متل الكذب ... كذب

طيب، بدكن ما تواخذوني رح طوّل عليكن شوي. بس ما بقا فيي ... بدي بقّ هالبحصة.
النَص اليوم لكل يلي بسوقو ببيروت وضواحيها...

ما بعرف قديش منكن بيتذكروا قبل 12 تموز شو كان فحوى لوحات الإعلانات على طرقات بيروت والضواحي ؟

كانت يا إخواني تقريباً كِلا دعايات Lingerie‘

إنو موسم صيفية واعد وما أشبه ذلك وشوب يعني ....

بس ما بعرف كيف بدي أوصلفكن ياهون يعني، بس أقل ما يقال فيهن إنو "فاتنات فالشات محاسنهُنَّ على الطرقات" ...
الله يرحمك يا مخايل نعيمي لأنو لو شفِت دعاية صدرية Triumph على جسر ضبية أنا أكيد إنو ما كان طلع منك لا أدب ولا نثر ولا من يحزنون ... وكِنتْ إتبلكمت لَ "سنون"

إنو إذا شي واحد بيتو بالبترون يا خيي وبيشتغل بمكتب هندسة عالجناح وبيسرِّب يومية عالبترون وبيشوف كل هالمناظر "الخلابة" عالروحة والرجعة ... إنو كيف هيدا بيوصل عا شغلو نهار تنين عبكرا أنجأ شربان فنجان قهوة وآكل كل هالوهلات عالطريق...ما بعرف...
ما بعرف كيف بيطلع منو هندسة نهارتا ما بعرف...وأنا مهندس يعني وعم بشتغل بشغلتي كمان وبعرف قديش بدا تركيز.
هلق صرت أعرف ليش ما في ولا جسر ضاين قدام الإسرائيليي لأنو أكيد مهندسينون محلولين من ورا دعايات ال Lingerie ...

طيب، ننتقل الآن أعزائي المستمعين إلى ما بعدَ بعدَ 12 تموز...

من بعد الحرب، طحشولكن البنوكي طحشة عالوحات الإعلانات ببيروت يا محلا طحشات "إم كامل" أو المعروفة أيضاً بطائرة ال MK على هالولاد المعترين الراكبين عا Mobilette أجلكن.

قال شو؟ مهما تلبدت الغيوم رح ترجع تشرق شمس لبنان ... حلو
أو معاً نبني الجسور إلى اليوم والغد ... فظيعة
وألذ وحدي هول يلي كتبوا كلمة دمار وقامو شحطوا الدال وكتبوا فوقا عين ... يا عين ... قلو يلي بيشوفك بعين شوفوا بتنين ...
وعزمنا صلب كالصخر ويلي عمّر مرة بعمّر كل مرة ... شيل ... يعني رح منقضيا عمر يا معلم العمار عا هالحالة

طيب، تا نقول في واحد شيعي يا خيي إنهدم بيتو بحارة حريك وهيدا كل شي بيملكو ... إيه، ومسائب الزَلَمي إنو منو حزبي ولنو اللهاوي ... علماني يا خيي ... شو ما بتصير يعني ... ما تلات رباع الشيعة صحابي بحيطولي وزِك بالعلمانية... وقرر هيدا إنو ما بدو ياخد مصاري من الحزب ... OK
ومسائب زلمتنا كمان إنو عندو أمل بمستقبل لبنان ... والأمل تبعو برّات "الحركة" عرفتوا كيف والمستقبل يلي هوي مفكر فيه ما إلو علاقة بتيارو ... وخصوصي مؤخراً لأنو صايرة معهن عا "تيارو" فيولة يعني ...

طيب قام صاحبنا وحمل حالو ونزل عند هول البنوكي يلي "ملزقين فيولة" عالوحات الإعلانات. شرحلون الوضع وقلون إذا في مجال "تقرضونا" لأنو بدنا نرجع نعمّر البيت من عرق الجبين...

أنا أكيد إنو "قرضوا" كحتة...

إنشالله ترجع دعايات ال Lingerie لأنو صادقة أكتر ................................

Monday, September 11, 2006

ليش...إجتماعي

ليش يا ربي في هالقد مطربين؟ مش حرام؟ دينينا وعقولنا يعني مش حرام؟

ليش بي بلدنا هالقد في فشّيخا وشراميط وناس بدا تتعاطى سياسة؟ ليش؟

ليش بس نِطلع ورا ديريكسيون بتوعى فينا غريزة البطش ؟

ليش بفضِّل شِّك بعيوني إبر ولا روح أعملي شي معاملة بدايرة رسمية؟

ليش المرا يلّي بتعجبني: يا مصاحبي، يا مجوّزي، يا قرائتا المفضلة مجلة الشبكة أو Mondanité؟

ليش المرا يلي أنا بعجبا ما بكون طايق ربّا مثلاً؟ ليش قولكن ليش؟

ليش بس تطلع بشي تاكسي، الشوفير بدو يبلّعك تحليلو لأزمة الشرق الأوسط كأنو قبل ما كان يشتغل عالخط كان محلل بشي مركز دراسات إستراتيجية بواشنطن؟

ليش صاير عم حِّس إنو ما في فرق بين نشرات الأخبار والمسلسلات المكسيكية؟ والأنكى إنو مرات بحس المسلسلات المكسيكية صادقة أكتر من نشرات الأخبار وفيها أقل مجون وعربدة.

ليش بحِّس إنو في كتير نسوان لبنانية رح يروحو يعيشوا بالناقورة من بعد ما إجا شي ألف عسكري طلياني؟ نحنا بالفوتبول ما كنّا مخلصين من التعليق فا كيف وحضرتن متواجدين على الأراضي اللبنانية؟

ليش مسلسلاتنا اللبنانية هالقد بهلة؟ ليش؟ إنو كل شي مرق علينا حروب وتواريخ وفاتحين ما إلتقالو شي واحد بيفهم يخبرنا شي قصة غير "من أحلى بيوت راس بيروت"؟

وأخيراً وهيدي يلي هالكتني أكتر شي
ليش مش قادر روح عيش برَّات هالبلد؟ ليش يا ربي ليش؟ ما عم بعرف...

ليش ...سياسي

ليش كل ما إسمع الياس عطالله أو فارس سعيد ما بِعود سايعني قاموس المسبَّات ؟

ليش كل ما إسمع نايلة معوض عم بتحلل بالسياسة الإقليمية قال، بحس إنو الهبل ما إلو حدود (إقليمية!!!)؟

ليش كل ما إسمع سمير جعجع أو حدا من بيت الجميّل دغري بقلب القنال ؟ ليش ؟

ليش بس إسمع بري أو جنبلاط دغري بعتبر إنو عم بيكذبوا ؟

ليش بس إسمع فؤاد السنيورة أو بيان المطارنة بقول لحالي "إنتوا حطكن عا حكي"؟

ليش بس إسمع ميشال عون بيعلى ضغطي ؟

ليش بس شوف مش إسمع عاطف مجدلاني أو نبيل دو فريج أو غنوة جلول بغشى من الضحك؟

ليش بس إسمع وليد عيدو أو ناصر قنديل أو وئام وهاب بستعوذ بالشيطان ؟ ليش يا ألله ليش؟

ليش بس إسمع سعد الحريري بيشفقني قلبي علي ؟ إنو شو ذنبوا هال Jagal دبّوا هالدبّي؟

ليش بس شوف ميشال المر بقول بعد في شي لون ما بيلبق علي هيدا؟

ليش بس إسمع حسن نصرالله بقول يا ريتو ما كان رجل دين ؟

Sunday, September 03, 2006

فنجان شاي


صار بدا فنجان شاي ... بس مش بمرجعيون
(أخدت هالصورة بالسوق الشعبي بمراكش سنة 2004)

Friday, September 01, 2006

بحبك

بحبك...بحبك متل ما الخمّار بحب الكاس

بحبك متل ما ألله حبّ الناس

بحبك متل مجنون ناوي عالأذى

لو شفت غيري حد مِنِك ناس


بحبك متل ما الراعي بحب القطيع

بحبك متل شي طفل مع إمو رضيع

بحبك غزالة شاردة بمرج الوسيع


بحبك متل ما حاتم(1) بحب الجود

بحبك متل عصفور عالعنقود

بتضل تجّرحني العيون السود


بحبك والهوى بقلبي صحيح

بحبك عا قد ما بيحتاج للطب الجريح

بحبك قد ما الإسلام بحبوا النبي

بحبك عا قد ما الرهبان بحبوا المسيح !!!

(1): حاتم طي، شخصية تاريخية إشتهرت بكَرَمِها
من شعر بديع يزبك.


وبيت عتابا عالخفيف بس مش كتير بريء!!!

عيون السود بسهامن صابوني
بـِ حبهن قلبي هايم... بس عصّبوني
ويا ريتو الربّ خالقني صابوني
تا إرغي وحفّ عا جسم الحباب
مش متذكر مين قلي ياه هيدا

Wednesday, August 30, 2006

مع الشكر ... والإعتذار

بدكن ما تواخذوني ... ما كان قصدي ...
بعرف إنو شي طالعين من حرب ... وأعصابنا عا صوص و نقطة
ومش قادرين نتحمل دكات ورعبات

بس ما بعرف شو صرلي ... مدري قلق ؟... "مدري غفلة عين... صرنا يا قلبي..."

وعيت شي الساعة تلاتي الصبح وفتحت "الحاسوب النقّال" أو
Laptop بالعربي ... (شو ترجمة Laptop دخلكن ؟ "فوق الحضن"
له...له هيدا كأنو إسم شي فيلم Sex ... شو فظيعة اللغة العربية !!!

حاصلو، بلشت إكتب وطلعت معي "رسالة إلِك" ...
مبلا ... "رسالة إلِك" قصتي ... وكل شي كتبتو مضمون ومكفول
ومعو شهادة منشأ كمان ...

بس ما كنت عارف إنو هالقد رح يجيني تعاليق (مش قمصان ... إذا في شي واحد عندو مصبغة وعم يقرا)
أصلاً ما كنت مقدّر إنو حدا عم يقرا يblog بالعربي ...

مايا بنيو يورك
كتبت شي "هزني" مع إنو ما منعرف بعضنا ...
بايبي كايوس
كتبت شي خلاني آمن أكتر بطيبة الجنس البشري ...
وكمان ما بعرفا
بس إعتذرتلي !!! وغمرتني !!! وهيي ما خصا بكل هالقصة لا من قريب ولا من بعيد

أنا كتير بشكركن ... وكتير بحبكن ... وحتى لو مش شايفكن
هيدا مش حب أعمى ... هيدا حب عالعمياني ... في فرق

في منن قالولي روق بسيطة ... بكرا الوقت بِحّلا (أو بيحتلا؟)
وإنو الحب حلو والغرام لذيذ وما تخاف يا صديقي العزيز

وحياتكن مش خايف ... ومش إنو "مطعوج" ومش قادر كمّل عيشتي
لا..لا ... أكتر من ماشي الحال ... القصة إلها شي تسع تشهر خالصة
ومبارح من يومين "تا خلفتا" ... إنو حْبِلت فيا منيح وخِلقِت بتِرما يعني...مش سبيعيي
والبراد مليان مغلي ... وجوز ولوز قد ما بدكن في ...

بس يلي ما كنت منتبهلو ... إنو من تسع تشهر ... حضرتا ...
"عملتلي واحد !!!!!!!!!!!!!!!!!!!!!!!!!!!!!!!!!!!!!!!!!!"


حاشية: (ليش دخلكن بيسموها "حاشية" ؟؟؟ أنا كل مرة بِقرا أو بسمع هالكلمة بتخيّل مرا ناصحة قاعدي بمطبخ ورا "لكن" ALAMINIO مليان كوسا منقور وإنو حضرتا الحاشية .... وكول يا معلم ...)

تأكدلكن إنو بعدني مآمن بالحب والغرام (والبكاء وصرير الأسنان) إعطوني شي يومين زمان
ورح إفقعكن قصيدة غزل من كعب الدست (تبَع الحاشية!!!) ... بس خلوني راجع الأرشيف
إلى اللقاء.

Tuesday, August 29, 2006

شو عاد بدي فيك

شو عاد بدي فيك يا قلبي
صرت حِمل تقيل عاجنبي
كنت عوزك كان عندي حب
واليوم شو بعوزك بلا حبي؟

يا قلب يا قلب ما أطمعك
حاج ترقص هالرقص ما بينفعك
تجوزت حتى خلِّص من مشاكلك
تاريك يا قلبي متل بعضا معك


من غنّية لوديع الصافي

رسالة إلِك


بتعرفي ... ما كان بدي إكتبلك
ما كان بدي إكتبلك...لأنو بعرف إنك ما بتقري
ولا جماعتك بيقروا ... مشغولين كتير بتطليع المصاري
أو صرف المصاري يلي طلعوها أهلن

ما كان بدي إكتبلك لأنو كان في حرب
لأنو ما كنت قادر شوف ولاد عم بتموت وأنا عم بتحسّر
على علاقة ماتت !!!
ما كان فيي شوف جسور عم تنهدم وإندم على علاقة إنقصفت

بس خلصت الحرب ... وأنا ما خلصت
بعدني حامل حدعشر سني عم بيقولو لي ... إكتوب
عم بكتب نكاية فيهن مش فيكي
ما بدي منك شي ... ولا عايز منك شي
وعارف ما رح تقري هالسطور بس أنا رح إقراها

عم بكتب كرمال الشارع يلي قبل بيتك
يلي كنا كل ما نمرق فيه، وعارفين إنو وقتنا
لليوم خلص، نقعد نبوّس بعضنا تايطلع الضو
أو يعجق السير الساعة تنتين عبكرا

عم بكتب كرمال الهمسات يلي نقالو عالمخدة
قبل الحب ووقت الحب وبعد الحب
عم بكتب كرمال جسمك العرقان يلي
يلتحم بجسمي وتقوللي مش معقول هالإحساس

عم بكتب كرمال كل المطارح بهالدني يلي
سافرنا عليها "من بغداد إلى الصين"
عم بكتب كرمال كل يلي حسدونا من الناس

عم بكتب كرمال كذبة "ما جمعه الله لا يفرقه إنسان"
طلع إنو بيفرقو كم محامي وعشرتلاف دولار
ومطران واطي قدام القرش

عم بكتب كرمالي أنا ... الرجّال العربي
الشرقي، المتوسطي
عم بكتب تقول إنو كل عقد الشرق الإجتماعية،
الجنسية والنفسية كبّيتا متل ما بكب
ولد صغير حجرة بالبير الغميق

عم بكتب لأنو رجوليتي ما بتنتقص
إذا حسيت حالي ضعيف قدام الحب
أو الحياة أو الموت

عم بكتب تاإعتذر من عينيي لأنو
صرت شوفيك فيهن عم بتصيري
متل إمك ... كارثة تصيري متل إمك

عم بكتب كرمال قلبي يلي
صار يخاف يحبّ
عم بكتب كرمال لساني يلي
صار يخاف يتغّزل

عم بكتب تاقلهن ما يخافوا
ولا يندموا
عم بكتب تاقلهن عيشوا،
حبوا، تغّزلوا
إقروا شعر وإسمعوا موسيقى
روحوا وتعوا هالحياة قصيرة

وآخرتا عم بكتب كرمال روحي
يلي آخدي الروح من روحي
وإنتي ما رح تقري هالسطور
إذا بتريدي من حياتي قومي
وتفضلي ... روحي

Saturday, August 19, 2006

لبنان يا غنية الإنسان

لـبنـان يـا غِـنِـيـةْ الإنســان لما بـنـاك بعظمتو الباني
جابك مَلَكْ وصخورك التيجـان وكل صخِر حامِل روعة التاني
وعندك إذا البترول مش خِلقان ولا بالحديد الأرض مليــاني
وتاتـصنـع الــذرة إذا ما كـان موجود فيــك المعدن الجاني
وحيَــات عينك إنت مش طَفران إنت الغني والنـاس طـَفراني
عندك شعب منو إجا جبران
وعبود ونعيمة وريـحاني
وفيك النِـدي والعـطـِر والألوان ونسمات عالأزهار سـهياني
وشلال رح يعمـِل عرس حرزان بـس ناطر أول عِـيَانـي
وفيك النهر جَـفلان متل حصان وسفح الجبل فوقو سرج حاني
وصنين عـم يــِصرخ بهـالميدان
أيا حصان بيسبق حصاني ؟
وأجمــل سنديانة الصِـبا عشقان على راس الجبل خلقاني
تشرين عـرّى الورد والـرمـان
وهيي ما صارت يوم عرياني
بالصيـف بتجَمِـــع ورِد نيسان
وبالشتي نسمات بِـرداني
وبَعرِف بـغَير محــَل يا لـبنان
فوق السنديانة السما بتكون
وعنـا الـسما تحت السنديانة
من قصيدة لطليع حمدان

حديث بيني وبين واحد فينيقي

الفينيقي: إنو ضروري تكتب بالعربي ... ما مابقا في حدا بيقرا عربي ... حتى المطربين يا خيي بيكتبو أساميون بالأجنبي على لوحات الإعلانات ... بتعرف ليش ؟

أنا: لاء ... ليش ؟

الفينيقي: لأنو هيدا الجيل الجديد ما بيقرا عربي بس بيفهم عربي

أنا: إنتا أكيد إنو "بيفهم" عربي؟ أنا حاسس إنو ما بيفهم شي ... لأنو لو بيفهم ما بيسمع هيك حقارة

الفينيقي: مش هون النقطة ... بدي أعرف ليش بدك تكتب بالعربي؟ ما إنتا تلميذ فرنساويي شي 12-13 سنة وبعدين الجامعة عند الأميركان ... بي نيو يورك مش ببيروت ... شي 6-7 سنين يعني نص عمرك تقريباً مقضي مع الأجانب ... شو بدك بالعربي ... مجلجىء كتير صار ...

أنا: بس يا خيي ... ما بعرف ... سبحان ألله ... مع إنو نص عمري مقضي مع الأجانب بس بعدني بحس بالعربي ... من جوا هيك مدري كيف ... في عندي أحاسيس أو إشيا بدي عبّر عنّا بالعربي

الفينيقي: بس ما إنتا بتكتب كتير منيح بالإنكليزي ... عبر عن هالإشيا بالإنكليزي

أنا: ما عم قلك عم حسّا بالعربي... شو بحسّا بالعربي وبعبّر عنا بالإنكليزي؟

الفينيقي: إيه

أنا: ما فيي، مش صادقة بحسّا

الفينيقي: لأنك عم بتحسّا بالعربي مشين هيك مش صادقة

أنا: إسكوت، مش مظبوط ... بعدين ليش هالقد مستحي بالعربي إنتا ؟

الفينيقي: مستحي بالعرب أنا مش بالعربي

أنا: ما تستحي، ما نحنا كنا عرب قبلن هول يلي مستحي فيهن حضرة جنابك ولما كان جبران ومخايل نعيمة و مارون عبود و أمين الريحاني عم يكتبوا "بالعربي" جامِعتك كانوا عم يتعنزقوا عاجمّال. ولما الأخوين تقلا كانوا عم بأسسوا جريدة الأهرام والصحافيي اللبنانيي عم "بيخلفوا" جرايد ...كِلا بتكتب للحرية بالعربي ... كانوا صحابك عم يتعلموا ينصبوا خيمة !!! نحنا العرب يا حبيبي وصحابك لحديت اليوم مجهولي الهوية