Sunday, September 17, 2006

مش متل الكذب ... كذب

طيب، بدكن ما تواخذوني رح طوّل عليكن شوي. بس ما بقا فيي ... بدي بقّ هالبحصة.
النَص اليوم لكل يلي بسوقو ببيروت وضواحيها...

ما بعرف قديش منكن بيتذكروا قبل 12 تموز شو كان فحوى لوحات الإعلانات على طرقات بيروت والضواحي ؟

كانت يا إخواني تقريباً كِلا دعايات Lingerie‘

إنو موسم صيفية واعد وما أشبه ذلك وشوب يعني ....

بس ما بعرف كيف بدي أوصلفكن ياهون يعني، بس أقل ما يقال فيهن إنو "فاتنات فالشات محاسنهُنَّ على الطرقات" ...
الله يرحمك يا مخايل نعيمي لأنو لو شفِت دعاية صدرية Triumph على جسر ضبية أنا أكيد إنو ما كان طلع منك لا أدب ولا نثر ولا من يحزنون ... وكِنتْ إتبلكمت لَ "سنون"

إنو إذا شي واحد بيتو بالبترون يا خيي وبيشتغل بمكتب هندسة عالجناح وبيسرِّب يومية عالبترون وبيشوف كل هالمناظر "الخلابة" عالروحة والرجعة ... إنو كيف هيدا بيوصل عا شغلو نهار تنين عبكرا أنجأ شربان فنجان قهوة وآكل كل هالوهلات عالطريق...ما بعرف...
ما بعرف كيف بيطلع منو هندسة نهارتا ما بعرف...وأنا مهندس يعني وعم بشتغل بشغلتي كمان وبعرف قديش بدا تركيز.
هلق صرت أعرف ليش ما في ولا جسر ضاين قدام الإسرائيليي لأنو أكيد مهندسينون محلولين من ورا دعايات ال Lingerie ...

طيب، ننتقل الآن أعزائي المستمعين إلى ما بعدَ بعدَ 12 تموز...

من بعد الحرب، طحشولكن البنوكي طحشة عالوحات الإعلانات ببيروت يا محلا طحشات "إم كامل" أو المعروفة أيضاً بطائرة ال MK على هالولاد المعترين الراكبين عا Mobilette أجلكن.

قال شو؟ مهما تلبدت الغيوم رح ترجع تشرق شمس لبنان ... حلو
أو معاً نبني الجسور إلى اليوم والغد ... فظيعة
وألذ وحدي هول يلي كتبوا كلمة دمار وقامو شحطوا الدال وكتبوا فوقا عين ... يا عين ... قلو يلي بيشوفك بعين شوفوا بتنين ...
وعزمنا صلب كالصخر ويلي عمّر مرة بعمّر كل مرة ... شيل ... يعني رح منقضيا عمر يا معلم العمار عا هالحالة

طيب، تا نقول في واحد شيعي يا خيي إنهدم بيتو بحارة حريك وهيدا كل شي بيملكو ... إيه، ومسائب الزَلَمي إنو منو حزبي ولنو اللهاوي ... علماني يا خيي ... شو ما بتصير يعني ... ما تلات رباع الشيعة صحابي بحيطولي وزِك بالعلمانية... وقرر هيدا إنو ما بدو ياخد مصاري من الحزب ... OK
ومسائب زلمتنا كمان إنو عندو أمل بمستقبل لبنان ... والأمل تبعو برّات "الحركة" عرفتوا كيف والمستقبل يلي هوي مفكر فيه ما إلو علاقة بتيارو ... وخصوصي مؤخراً لأنو صايرة معهن عا "تيارو" فيولة يعني ...

طيب قام صاحبنا وحمل حالو ونزل عند هول البنوكي يلي "ملزقين فيولة" عالوحات الإعلانات. شرحلون الوضع وقلون إذا في مجال "تقرضونا" لأنو بدنا نرجع نعمّر البيت من عرق الجبين...

أنا أكيد إنو "قرضوا" كحتة...

إنشالله ترجع دعايات ال Lingerie لأنو صادقة أكتر ................................

9 comments:

Anonymous said...

أنا مش قاهرني لا عرض النسوان على الطرقات ولا قرض البنك اللي صار بالنتفات بس اللي قاهرني زلمتك العلماني المعتّر ولبنان

قارئة جديدة وعدتك اليوم إنّو تّابع كتاباتك

achinar said...

يا ماما شو عينك ضيئة إنو شو بيصير يعني إذا أعدنا نعمر و رجعنا نعمر وضلينا نعمر؟؟؟ إنو شو فيها يعني. ويعدين هيدولي لبنوكي عن جد حرام وهني عن جد بدَون مصلحتك بس انت مش شايف أديش هين ألبون عليك... ولاو يا إبن بيروت ما اتفقنا هيك

linalone said...

بعتذر أشينار، بس آخر شي بدون اياه البنوك هو مصلحة الزبون، مصلحتون هني بالأول. لبنان مليان عهر سياسي و اقتصادي و اجتماعي.

Maya@NYC said...

mmm... don't worry....bokra byejo el intikhabet, w badal souwar el lingerie wel bank, you will be saturated with pictures of models with moustache....
w bfadel malyoun marra to have banks loaning money to Lebanese, instead of having whatever's left of the country to be sold to neighbors and lovers....

Ana Min Beirut said...

Hey Linalone, we missed you at the bloggers dinner ... I think Achinar was being sarcastic ...

Anonymous said...

God, Mikhael Ne3aymeh and Triumph Bra !!! What imagination ...You have a twisted mind my friend and we love u for it ...Keep posting

Delirious said...

:)

Coco said...

حلو كتير هالنصّ
Interesting also to know what replaced the bra collections on the highways.
ما بتصوّر في فرق كبير بين لوحات الصدريّات واعلانات البنوكي... كلّو مغذّي للخيال... فقط لا غير

blackr0se said...

عيد مبارك انشاء الله على الجميع
اسمحلي يعني وصلت اليوم من بعد ما رفيقتي خبرتني عن البلوغ تبعيتك
ما قدرت ما خبرك كم بنك و بنك صرت زايرة عالشهر و احسن واحد فيهم الكذاب و صولا لابن الكلب يعني مكلفين نفسهم و عاملين هالطحشة الاعلانية على ما شي معقول ؟معقول حاطين كل هالمصاري هيك بدون ما يجربوا فعلا يوقفوا حد الناس ؟عنجد عنجد يا محلا اعلانات اللانجري على القليلة قادرين نستفيد منها :)

سامحونا يا جماعة ,فتنا بلا ما ندق على الباب :)