Friday, October 20, 2006

لازم...سياسي

لازم دوري شمعون يعمل رئيس بلدية تيزي أوزو (مبلا مبلا بال"تي" مش بل "طه")
لازم يلاقولا حلي لَ نايلة معوض...وعالسريع بكون أفضل مشان أعصابنا كلنا
لازم فارس سعيد يسكت لأنو كل ما يفتح تِّمو عم بفوت "هوا"
لازم سمير فرنجية يعمل نايب عند البوليساريو...هول بالصحرا الغربية المتنازع عليها بين المغرب وإسبانيا
لازم مي شدياق تترك كل شي وتروح تعيش بعنايا وتتعبد لمار شربل وتترك السياسة وتشكر ربَّـا...
لازم الياس عطالله يرجع عالمخترة بالرملية لأنو أنا أكيد بضـّييع بطريق طرابلس
لازم الرئيس لحود يخفف برونزاج. صرنا بنص تشرين يا شيخ !!!
لازم رجال الدين يخففوا التعاطي بالدين ويركزوا أكتر عالسياسي بركي مناخود نتيجة لأنو بالدين بدّن بعد فتّ خـِبز
لازم بعض الصحافيي يلاقلون وظيفة تسند وظيفة الصحافة لأنو الأقلام المأجورة متل "توب العياري"
لازم بعض الجرايد تصارح هالكم واحد يلي بعدن بيقروا جرايد إنو إذا ما في متمولين سعوديي أو إيرانيي يدعموا ما فينا نطبع الجريدة! فا إنتوا وعم تقروا خدوا هالشي بعين الإعتبار
لازم نشرات الأخبار يكون فيا أقل لئمني وشي رشة موضوعية (إنو أنجأ عرفتوا كيف؟ عا أساس كترة الموضوعية بتنزع الطبخة)
لازم كلنا سوى نلاقيلنا شي طريقة يركب فيا البلد مش على Axe سعودي/فرنسي/أميركاني أو على Axe سوري/إيراني...أنا منـّي وعليي مستعد إركب عا خازوق بس يكون لبناني...

6 comments:

Khawwta said...

بدّك تلاقي خازوق لبناني
كلّو صار مستورد
وأصلاً إذا لقينا كم شجرة تنصنعا خوازيق ما رح نعرف بالصناعة
وبردو إذا عرفنا صنعناها بتكون مأخرة كتير ومش عالموضة
عكل حال منيح مش عم نصنّع خوازيق لبنانية بعد في عنا كم شجرة عايزينون تنصنعون تذكارات عن بلاد الأرز

Eve said...

على سيرة رجال الدين، قال شو هالسنة ناويين يتحدوا ويعيدوا مع بعض! لك عمين. الاثنين العيد عالعمياني!
ما كلنا موظفين متل بعض، وعطلة من السبت للثلاثاء حرزانة :p

achinar said...

والله يا ابن بيروت أنا شايفه إنو لازم تحل عن سما هالسياسين واللي بيطعاطو سياسة و تتركهن يعرفو يشتغلو شوي!!!!!! ولوه
إنو شو بدك يعني إزا (لاحظ ال إزا) شو بدك إزا رئيسنا بيعمل كل يوم برونزاج, لشو الغيرة والدود طب ما هو ما بتجي القريحة إلا تحت هالشمسات ولوه!!!
وبعدين يا خيّ شو إلك مع رجال الدين , تركون يا عمّي يلقطو رزقون بعقول هالشلعوطين و نص لبنانيي اللي ما عاد فيون عقل .
وكل شي ولا مي شدياق, لو سمحت, لو سمحت يعني لو سمحت لا تقرّب على بنت الشدياق. بتتعبد لمار شربل, بتتعبد لسانت ريتا, هي حرة. بدا تضلا تطلع عالتلفزيون جكارة باللي مش عاجبو. هيني هيك بنات الشدياق عطول مشكلجيي و بيشترو المشكل شراية
شو بعد في شو بعد في... إيه الخوازيق, شو هي وقفت عالخوازيق ما كل شي عنا مستورد عا قولة كل شي فرنجي برنجي فا ما وقفت عالخوازيق

Maya@NYC said...

agree with you 99%...
el 1% of disagreement relates to khwazi'... am not sure will agree to khwazi' anymore... and no one will allow you eno trouh da7yet el karameh wel sha3b el 3anid!

hillz said...

الخازوق أصلو عثمنلي يا ابن بيروت ;)

Ana Min Beirut said...

إيه ما إختلفنا بس ما في أشطر من اللبنانيي "بتنجيرو" ـ