Wednesday, January 17, 2007

يا سلوى ليش عم تبكي ؟ـ

لما كنـّا زغار كان في غنية إسما يا سلوى ليش عم تبكي ؟ كانت تجاوب سلوى عم ببكي بدي رفيقة ... وبتكمل الغنية وما عدت زاكر باقي الكلمات ...

من شي جمعة زمان، كان في إجتماع لمجلس الأمن بيتعلق بالتحقيقات الجارية بجريمة إغتيال المرحوم الرئيس الحريري وقدم المحقق الدولي سيرج براميتس تقرير عن المستجدات والتطورات بالتحقيق وقال بطريقة ملفتة للنظر إنو في بحدود عشر دول مش عم تتعاون بطريقة كاملة أو جزئية وبيعتقد إنو عندها معلومات فيا كتير تساعد وتسرِّع التحقيق بهالجريمة.
لما سمع هالشي الرئيس الدوري لمجلس الأمن ويلي هوي هلق روسي (حليف سوريا الإقليمي يعني) بيتقدم بطلب لمجلس الأمن لإصدار قرار يسمح لبراميتس بتسمية الدول الغير متعاونة وإجبارها على تقديم المعلومات اللي عندا. فبقوم المندوب الأميركاني (يلي عم بيشدوا ويقدوا منشان المحكمة الدولية) بيستعمل حق النقض (الفيتو) وبيسقط القرار!!!

لما سمعت وقريت عن هالحادثة تذكرت غنية لفنانة لبنانية صبية إسما تانيا صالح، في كتير منكن ما بيعرفوى لأنو مجلة الشبكة/الجرس/نادين ما بتجيب سيريتا لأنو نوع الفن يلي بتتعاطى تانيا هالمجلات مش سامعين فيه أصلاً. حاصلو تانيا صالح كتبت غنية قبل بكتير من 14 شباط 2005 إسما يا سلوى ليش عم بتبكي بتجاوب سلوى عم ببكي عالحقيقة ... مدري ليه دغري خطرت عابالي هالغنية ...
"يا سلوى ليش عم تبكي ... عم ببكي عالحقيقة ... قومي تا نرقص دبكة وعـلـّي صوت الموسيقى"












مين هيي هالدول يلي مش عم تتعاون مع براميتس وشو عندا معلومات معقول تفيدو ... هاي معلومات فيني قلكن ياها لأنو قريت عنـّا من عدة جرايد وتحاليل (أكتريتا أميركانية) أما ليش ما بدا هالدول تعطي هالمعلومات بدنا ننطر شوي تانشوف شو ببيّن:
الولايات المتحدة: عندن صور مأخودة من الأقمار الإصطناعية قبل وبعد حصول الجريمة كما يعتقد إنو عندن معلومات إستخباراتية كتير مهمة.
فرنسا: بعد لهلق ما سمحت السلطات الفرنسية لسيرج برامتيس أو حدن من معاونيه إنو يستجوب محمد زهير الصديق يلي هوي الشاهد "الملك" بهالجريمة.

"الحقيقة مُرّة يا بنتي وإنتي قلبـِك حنون ... لا إسمعتي ولا إقشعتي ... خليكي بلا عيون..."

ألمانيا: يبدو أنو لما السيد ميليس كان هون، كان في معو "حوسة" من جماعة المخابرات الألمانية وهالشبيبة الناهضة جمـَّعِت معلومات لا بأس بها ويبدو كمان إنو نايبو للخواجة ميليس عِمِل السبعة ودمتا بس لمّا فل ميليس ضبضب كل شي وأخدو معو وإلمانيا رافضا إنو تعطي هل المعلومات لبراميتس كما إنا رافضا تسمح إنو براميتس يستجوب نايب ميليس.

"ما ناقصنا معلومات...منحكي بتلات لغات...وساكتين ما أحلانا يسواكي ما يسوانا..."

إسرائيل رافضة تتعاون (أكيد) وأستراليا كمان. إذا بتذكروا كان في ست حجاج إستراليي شباب إنقال إنو إلتقى آثار لمواد متفجرة على كراسي الطيارة يلي كانو راجعين فيها عاإستراليا... يمكن ما خصن ويمكن خصن بس “Tante Ostralia” ما بدا إنو براميتس يحكيون للشبيبة أو يطلع على ملف التحقيقات بالمواد المتفجرة يلي إلتقت عا مقاعد الطيارة. طيب ليش يا إستراليا؟ الله أعلم !!!

"لما تشوفي شواز... حطي فيزا عالجواز...وفلـّي إزا قدرتي...وين نحنا وين إنتي"

السعودية رافضة تعطي معلومات إزا هول الستة الأستراليي كانوا بالحج ولا لاق. وكمان يبدو إنو السعوديين إستجوبو موقوف بلبنان بتهمة إنتمائه للقاعدة وتبين إنو هيدا الشب منتمي لمجموعة شي 12-13 واحد وإنو في منن بيعرفو أحمد أبو عدس وزميلو خالد طه يلي إنشقت الأرض وبلعتو. أكيد السعودية رفضت تفرجي هالملف لصاحبنا سيرج.
الكويت رفضت إنو براميتس يستجوب أحمد Spielberg الجارالله يلي نشر بصحيفة السياسة ماهبّ ودبّ ويبدو إنو في إشيا قالها الصدّيق تتطابق مع معلومات نشرها الجارالله. فا حابين لجنة التحقيق إنو يستوضحوا لـ Steve Austin, the six million dollar man بس الكويت رافضة.
الإمارات ما بدا تقول شي أو تعطي أيّ شي عن الميتشوبيشي !!! العمى ليه ؟؟؟ مع إنو طِلِع من عندن، كمان الله أعلم.
هلق آخراً وليس أخيراً البرازيل ما بدا إنو حدن من لجنة التحقيق الدولية يستجوب الست رنا قليلات لأنو مشغولي عم تتعلم رقص الـ Samba مشان كرنفال الجاي... هلق إزا في رابط بين بنك المدينة وجريمة الحريري مش ضروري سيرج براميتس يعرف فيه...

"الحقيقة اللي قدامك عمرك ما تقوليها... الكلمة اللي عا راس لسانك يا بلعي يا بلعيها..."

بدون شك إنو يلي ضالعين بمقتل الرئيس الحريري بدن يعطلوا المحكمة الدولية بس في حدن يقلي مين وليش عم بعطل عمل لجنة التحقيق ؟؟؟

كنت متوقع كل شي إلا إنو تانيا صالح "تتنبى" عن مصير التحقيق بجريمة إغتيال العصر "تلات" سنين قبل ما تحصل.
الله يرحم كل الشهدا لأنو عن جد: العترة عا يلي بموت.

9 comments:

Anonymous said...

ma aznakhak w at2al dammak wlohhhhh
bi ghadd lnazar 3an l7a2i2a ya3ni.

Waleed M.

Maya@NYC said...

i think Brammertz should interrogate Tania Saleh. wade7 eno el benet ken 3enda ma3loumet!

Ana Min Beirut - أنا من بيروت said...

Waleed, til7ass tizzeh wlohhhhhhh
bi ghadd lnazar iza ......

Anonymous said...

Tania Sale7 tnabba2it bi kell terikh Lebnen yalli 3am yenkatab bi hal ghenniyyi; ma we2fit 3ala te72i2 ma2tal el 7ariri faqat, no?

Strangely enough, this song made it to Toronto's arabic TV cable. I think it was in a concert made for Lebanon in Egypt after the July war, Tania Saleh and Ahmad Kaabour. A refreshing change from the usual heshik beshik w khale3 w ale3 w Ho22o w Aaah w Oooh :)

Awlak fi 7ada 3an jadd bi hemmo yle2eh "conclusion" la hal ta7qiq, including el lejneh wel ma7kameh el dawliyyeh, ya tara?

Anonymous said...

i read this post carefully(not as challenged as u thought)..haven't been following politics lately, so thank u. interesting. all the events seem related, but nothing is clear. not only hariri's murder but the july war and paris 3 and this eternal unstable equilibrium. what is happening and who's behind all of this? where's the country going? who in the world is(or not) profiting from all of this? i gave up on lebanese politics a long time ago. i hope only for a "stable equilibrium" one day.
(i can never listen to ur songs. maybe it's the laptop that's challenged..)

Khawwta said...

ma ba3rifff lich tzakarit tabkhit l makhlouta basss 2ritt hal post
yimkin la2ano lwra2 killa nkhalatit, lkil mouznibin wtchawchatit l tabkha

Anonymous said...

شوف انا رات و متل اجري السياسة و اسياسيين
بس الغنية بتقول: عم ببكي بدي رفيقة، قومي نقّي شي رفيقة
بشعة، بشعة بشعة حلوة و هكذا دواليك حتى اصابع رجليك

Anonymous said...

بشرفي انك بتفهم....الهيئة انت كان عندك معلومات كمان بوئتها

Anonymous said...

hala ma 3layna ni7na w zghar kina n2ul badi rfi2a w kfeyita shu ba3den i agree ma3 li 2al they should interogate with salwa sali7 :P.lol man ur hillarious