Tuesday, October 24, 2006

في السياسات الوطنية و...الطبخ!!!ـ

نحنا شعب بحب بطنو. وأنا أول واحد. ومش عم إنتقد ولا لطـِّش. ما فيا شي عيب يعني إلا وقت إلي بيسيروا إجرينا يتفركشو بكـِرْشنا... بقا من هونيك ورايح بدا حلّ جزري (لاء، الحل الجزري مش كوكتيل عصير جزر. الحل الجزري ما إلو علاقة بالجزر أو عصيرو)ـ

هلق مؤخراً إتبيـَّنلي إنو في شي عيب كمان بما يخص الأكل أو الطبخ غير زيادة الوزن وهوي عم لاحظ كتير إنو سياسات بلدنا الوطنية أو الحكومية أو السوسيو أنتروبولوجية (يحرق إختا هيدي بتحرقلك شي 300 كالوري تاتقولا بس) مستوحات من الأكل أو الطبخ أو ما أشبه ذلك.

إتفضلوا... (عالطاولة... مش لـَجُوا... إلا إذا كانت الطاولة محطوطة جُوا!!!)

أولاً: في السياسة الدفاعية
أكيد ما بدا إتنين يحكوا فيا ... سياستنا الدفاعية كناية عن فنجان شاي. هلق هيدا بالعموميات بس سياستنا الدفاعية معقدة أكتر من هيك:

الدفاعات الأرضية منقدم شاي أسود سيلاني...سريلانكي يعني، عا أساس كلنا معلمين ومش فاضيين نحارب براً، وكل هالسريلانكيي شو عم يعملو؟ ينقبروا يعملو شاي !!!

الدفاعات الجوية، هاي أرقى وبدا عـِلـِم ودراسة... فا منضيـِّف شاي إنكليزي إسمو Earl Grey Tea. ما فيكن تتصوروا قديش فعـَّال هالشاي بالدفاع عن الجسورا ومحطات توليد الكهربا. للأسف كان مقطوع هالنوع الشاي بالذات تموز الماضي عا أساس صيفية وشوب والشاي بينشرَب بالشتي ...

الدفاعات البحرية، هيدي من زمان وجِّر منضيِّف زهورات وخبيّزي ... منيحا للإسهال عأساس ما في "إسهال" من إنك تغرقلنا أيَّ فلوكا للبحرية اللبنانية. بس بإذن الله إذا موسم الخبيّزي منيح سنة الجاي شو بدك... منيموم حاملة طائرات!!!

ثانياً: في سياسة إدارة الدين العام
يعني أقل ما يقال فيها إنو "بالرِزّ بصَل" يا خيي بعلمك كانو شي مليارين طن رزّ و"إز" بيزيدولون شي تمـِناوتلاتين مليار طن بصل وعملولنا بالرز بصل.

ثالثاً: في سياسة إلغاء الطائفية
طبخة بحص!!! وهاي تما نرجع ما قبل إتفاق الطايف أو إتفاق "قطايف" بقشطة محمضة ومعفنة.

رابعاً: في سياسة حماية البيئة
كبة نية مدقوقة بالجرن. والجرن ساحبينو من حيَّلا كسارة بالجمهورية اللبنانية... نقي وإستحلي... عاأساس في كسارات أكتر ما في مطربين والمدقة هيي مخططات الإنقاذ والبيئة المعترة شقفة لحمة هبرة علقانة بين مدقة المخططات الإنقاذية وجرن الكسارات...وكول يا معلم...بصحتك

خامساً: في سياسة وضع قانون عادل للإنتخابات
لبن إمو ورِزّ. مع إنو تا يكون عادل لازم تاخدو بلا رز خصوصي إذا الرز من تبعول رقم تنين فوق. بقا خلينا بس عاللبن إمو. بس كمان إنتبهت هلق إنو مش معروفي مين إمو لأنو حلاّ إتخـّلفو بقا ريتو يسلم لأمو.
وهون بس رح إضطر حيد عن موضوع الطبخ وفوت بموضوع المسبّات... وفي مسبة كتير بتلبق لَ هالقانون الإنتخابي منتركا لمخيلتكن بس مكوّني من كلمتين وتاني كلمة "إمو"...

سادساً: في سياسة "السيادة"
كان إلنا فترة متبعين سياسة البرازق. الظاهر إنو عملنا حساسية عالسمسم فا وصفولنا الهامبرغر والـ Escargot مدري الـcamembert.

بس في ناس يا خيي، أنا شفتون بعيني، كان الصحن مليان برازق وحطوا فوقن camembert ... والله العظيم. ونزلوا أكل كأنو ما صار شي. شو بدك نفِس قطـِّيعة أكتر من هيك؟ ألله سَتـَر وما حطوا الهامبرغر دغري... في أقرف من البرازق مع سلطة الملفوف والمايونيز؟

ليكو وليه... متل ما شايفكون وشايفيني...يا رح تبلشو تاكلو تبولة يا رح تجبرونا نطعميكون شي مش ولا البد...وبعدني مُصـِرّ خلـِّص هالبوست بالطبخ ومش بالمسبات !!!

10 comments:

Eve said...

والكنافة بأيّ سياسة بتندرج؟ :)

Khawwta said...

حلوة الفكرة دمج السياسة بالطبخ
وهو بالأساس السياسة طبخة كبيرة الغريب إنا بتضلّ مشوشطة عنا بلبنان
مع إنا مشهورين بطبخنا الكتير طيب
بكل الأحوال بدي قلّلك عجبتني الخاتمة أكيد التبولة أطيب وأخف من المسبات

AM said...

Hey, at least you made it without msabbet, ma3 enno one get very tempted enno yseb when talking about politics be hal balad :D

Anonymous said...

fenjen ahwi mora ma3 argileh m3asal tefe7 lal set nado law sam3et w min ba3ed izenak... ( ma3 eno la bshrab ahwi wala bdakhen wala b2argel, bass YALLA ..lol)
shu ya enta min beirut w ana min jnoub... fet7a ma3ak 3al tabikh l msayaas :P
bye3mal 7ar2a hek post .. 3endak wasfe dod el 7ar2a? DOCTOR?

3a kel 7al w 3a kel el a7wel 7elow el post w mahdoum kal 3ada!

linalone said...

Hilarious 3anjade. I do wait for your political posts. :)

Rania said...
This comment has been removed by a blog administrator.
Rania said...

آها!! في حدا عم يتعدّى على إختصاصي... الطبخ, لبن إمو و تبولة و
escargot على hamburger!!!
أوكي ما في مشكلي إنو توسّع نطاق النقد "الموضوعي" إزا بدك. خصوصن إزا مطبخك
fusion
من الدرجة البريمو
بس مش شكلك نسيت الكبسة اللي بي
corner
السيادة؟؟

Coco said...

LOL Akh ya Allah! Awwal marra bed7ak hal2add w 3ala sawt 3aleh bel sheghel.. damma3et add ma d7eket w al shou? 3am jarrib khalleh bouzeh msakkar!

Ballashna bel "إجرينا يتفركشو بكـِرْشنا" w karajit men honik raye7

El lezzeh fina ne7na el lebneniyyeh enno dammna khafif 7atta w law belna bi dall bel akel, w aw2et ktir bel msabbet bi doun shakk..

Leyk, Sayf el Ba7r, arjouk, ma ttannish 3an el ahweh w arguileh 3ala tawlit nado, ana jeyeh seyera fiyoun, holeh la akel wala msabbet, wasfit 7akim (entebih, mesh "el 7akim", ma tekhlout bel rezz bassal please)

This was a great read! Thanks a lot :)

Delirious said...

:)

Witty and pertinent as usual.

Maya@NYC said...

kello ok... bas el laban emmo, please please, khalli barrat el syesse!!! di3ano fyoun...:)