أدمنت خطابات أمين الجميّل

نص مقالة "أدمنت خطابات أمين الجميّل" كما قرأته صباح أيوب في حفل ضبية، كانون الأول 2012

على ما يبدو

مستوحاة من أغنية جوليا بطرس الجديدة "على ما يبدو" ـ

إبصق بوجهي

أمس اتصلت بالأمل
قلت له: هل ممكن أن يخرج العطر لنا من الفسيخ والبصل؟
قال: أجل

قلت: وهل يمكن أن تشعَل النار بالبلل؟
قال: أجل

قلت: وهل من الحنظل يمكن تقطير العسل؟
قال: أجل

 

قلت: وهل يمكن وضع الأرض في جيب زحل؟
قال: نعم، بلى، أجل....فكل شيء محتمل

  

قلت:

 إذن حكام العرب سيشعرون يوما بالخجل ؟

 
قال:ابصق على وجهي
إذا هذا حصل

البطل مات...والسياسي فات

كتير بيعجبني هالحديث

بين سطورو في كتير معاني مخبايي

وكنت ناطر إني حطو بيوم ما يصادف ذكرى "شي" بهالبلد

يلي كل يوم لازم يكون ذكرى شهيد أو إنتفاضة أو عيد شي قديس أو نبي

بعتقد إنو اليوم 21 شباط يوم "عادي" يا أخي

مش ذكرى شي مجزرة أو شي طحشة أو شي عيد بلا طعمة غير إنو لازم

العالم تصرف مصاري وتستهلك عا إشيا أكيد ما إلها لزوم وآخرتا بالزبالة

الحديث من مسرحية المحطة للأخوين رحباني

دور الحرامي : أنطوان كرباج
دور الشحاد : سامي مقصود

صحيح أنتَ بطل أكتر مني...بس أنا سياسي أكتر منك،
وتنايناتن السياسي والبطل لازمين لمصلحة الوطن

مشاهدات من مقاهي بيروت

صرلي فترة، تا إهرب من عجقة السير من بعد الشغل ، بروح بقعد بقهوة ببيروت ....منو منشربلنا فنجان قهوة عرواق ومنو منقرا شوية جرايد ولاحقين نسرّب عالبيت بتكون خفت عجقة هالسير شوي .... من بعد كم يوم عهالمنوال صرت لاحظ يا أخي إنو هالقهوة العم روح عليا فيها شي بروس شي بلا روس...شي بيجنن يعني....قلت خيي خلني غيّر قهوة... خلني روح عا تاني ميلي من بيروت بركي التوزيع الطائفي هونيك بكون أرحم.... بس عبس... هالقهوة كمان ملياني "عباقرة مساطيل" فقلت صرلي فترة ما عملنا شي عا هالبلوغ.... فا بلوغ يا صبي وعمول شي للبلوغ !!! هونيك ليلة أنا ومسرّب حاطط الأيبود "شافل" بتمرق هالقطعة للرحباني.... فا ما في لزوم زيد شي أنا... تاري كانت تصير معو حتى قبل أيام الحرب الـ75.... كيف حاملي هالبلد هالقد فنانين وعباقرة ما بعرف...بس إذا رح منكمل هيك ما عاد فيني إشرب قهوة إلا بمطبخي

Quotable Quote: أفلاطون فايت....أفلاطون ضاهر

خود عا رُقيّ

الموسيقى الخلفية "الراقية" إسما "وقمح"ـ (تا ما نقول غير شي)ـ لزياد الرحباني من ألبوم دا كابو أبو ظبي (تا ما نقول غير شي) ـ

FENG SHUI !?!?!?!?

الموسيقى الخلفية إسما Plack Doudou لإبراهيم جابر من ألبوم FACES

من الأرشيف .... ومن وحي هالأوضاع

العم يحكي إسمو عبدالله النبوط وهو من مسرح الساعة عشرة يلي كانت أهم فرقة مسرحية بالسبعينات.ـ
الحديث عن أحداث عين الرمانة والشياح بالـ 75ـ
أيضاً وأيضاً الحديث من 33 سنة بس مدري لي يا أخي ما حدا عم يتعلم شي من هالتاريخ
كلنا شاطرين بالـ Math أجلكن وما منقلل عقلنا عالتاريخ لأنو التاريخ ما بيطعمي خبز!!!!ـ

إسمعولي هالقطشة: وفد ...وفد

كنت حابب علـّق على كل هالموفدين والوفود يلي أتحفونا بوجودن وبتطميناتن إنو "ولا يهمكن" رح يكون في رئيس وبالمهلة الدستورية كمان....وكان كلو كلام بكلام فا حابب إهديكن هالقطشة من مسرحية "يعيش يعيش" للأخوين رحباني
وكمان حابب إهدي هالقطشة لكل يلي "مجهزين" البروايز وناطرين مين بدو يكون الرئيس تا دغري يعلقوا الصور .... الدني مع الواقف ...ولو كان ......ـ

Quotable Quote:
الجوقة: ويلي سلاحو ظاهر يا جناب الشاويش ؟ـ
الشاويش : يلي سلاحو ظاهر ....ما بدو تفتيش

هالحديث صار من 35 سنة ...بشرفي .... يلعن الكازب.... وبشرفي ما تغيّر شي .... ولشو التغيير!!!!!ـ

خلصنا، ولكن ... ـ

لَ يلي منكن بيعرفو الحقير صاحب هذه المدوّنة شخصياً ... بيعرفوا إنو هوي مُطـَّلق منذ حوالي سنة و"نيف"
فعلياً تم الإنفصال من سنة ونص إنما مبدئياً وعلى الورق مبارح من يومين تا "أخلي سبيل الموقوفين" ...
وكنت مقرر إنو هالمرحلة من حياتي صارت ورايي وإنو ما رح فكـّر إلا بالإيام الجايي وإتعلـّم من الأيام اللي مرقت ... بس لما قريت السبب اللي إتكلت عليه المحكمة الروحية لإبطال الزواج حسيـّت بمرارة مصحوبة بكتير كتير من السخرية ....

تا نحطّ الأمور شوي بنصابا كان القرار بالإنفصال متبادل وإعذروني عن عدم ذكر الأسباب الحقيقية (ولا ما خِنِت متل ما بعض الخـُبَسا لتلتوا وهيي كمان ما خانت) لأنو إتفقنا إنو إتضل الأسباب الحقيقية بيناتنا وبالفعل ضلّت لحديت هلق بيناتنا وأنا ما رح غيّر بالإتفاق ... إتوافقنا وترافقنا وكمان إتوافقنا وتفارقنا .......

بس لا ... بالقانون الكنسي ما فيكن تتوافقوا تا تتفارقو !!! لازم واحد من الشريكين يتشكى عالتاني وإلا ما بتصير !!!
لما خبـّروني هالـ"بلوتيكا" دغري قلتلن أنا ما بدي إشتكي عا حدا خليون هني يشتكوا... اكيد جماعتي طارو عقلاتن بس ما تركنا مجال للنقاش ...

فا إتقدم المحامين تبع ال "ex" بدعوى ضد حضرة جنابي لقاضي بالمحكمة الروحية وحكملن جنابو وأتحفوني بالسبب المقدم: (الفقرة التالية مأخوذة حرفياً من الدعوى)

حصل التعارف بين المتداعيين بحكم متابعتهما لتخصصهما الجامعي في الولايات المتحدة الأميركية وقد نشأت علاقة صداقة بينهما تخللتها الكثير من فترات الإنقطاع لأسباب تتعلق بوضع كل منهما الخاص.
لم يكن المـُستدعى ضده (يعني أنا) يخفي خلال فترة التعارف رأيه الخاص بالزواج وقد تأثر بالعادات والتربية والأفكار التحررية السائدة في الولايات المتحدة الأميركية حيث تابع تخصصه الجامعي، فالزواج بالنسبة إليه عقد كسائر العقود يتوقف إستمراره على نجاح الحياة المشتركة ويدوم بدوام التفاهم والإنسجام بين الزوجين من هنا كان الدافع إلى التلجئة من قبله. (ما بعرف شو يعني تلجئة وما بدي أعرف)

عا فكرا ما حدا منن سألني شي بهالخصوص قبل ما يقدمو الدعوى فكنت متفاجىء بهالسبب ومتل ما قلت حسّيت بمرارة لِحقتا كتير سخرية وقررت إبعتلو مكتوب للمحامي تا "صححلو شوي بالمعلومات" عا إساس إنو إعتبر الأفكار التحررية والعادات والتربية جبتون من أمريكا فا كتبتلو قلو إن وحياتك ما نطرت تا روح عا أميركا منشان الأفكار التحررية والعادات اللوقة وإنو أهلي كفـّوا ووفـّوا بالأفكار التحررية وأنا بعدني بلبنان وكنت بعدني عالـ "cerelac" أجّلـَّك ... وإنو جدي عطاني كتاب "كفر وإيمان" لخليل روكز وكنت بعدني بالـ" Quatrième" وإنو إيه مظبوط الزواج بالنسبة لإلي مش عقد ... بل شغلي أعمق من هيك بكتير... لأنو إذا بدي إستأجر سيارة بدا عقد أو جيب عامل أجنبي بدا عقد ... بس تا شارك حدن بحياتي بدا أكبر وأعمق من عقد ... وختمت المكتوب بقصيدة من كتاب كفر وإيمان إسما "قالو أنا كافر"

ما بعت المكتوب ...

بلاغ رقم واحد....وأخير

ملاحظة: عضاريط جمع عضروط وما بتوحي بأي نكهة يعني متل لما بتقلو لبياع البوظة واحد كورنيه "عا" قشطة. لاء. وعافكرة العضروط هوي صعلوك وحتماً العضاريط هنـّي قرطة صعاليك

حديث من وحي نهار الخميس

إتصل فيي واحد صاحبي عايش بأميركا وجانن عقلو على المشاهد يلي شافا نهار الخميس. ما كان مصدق إنو هيك مناظر بلشت من مشكل بالجامعة !!! فطلب مني إنو فسرلو كيف؟ وليش؟ وشو صار.

إذا بتحبوا تسمعوا التحليل ما إلكن إلا تكبسوا "بلاي" !!!

TAGGED

بعتتلي إيف 21 سؤال قال إذا بجاوب عليهن فيّـا هيي ورات إنو يكـّونو فكرة عن كيف بفكروا الرجال.

هيدا سؤال ورد جواب فا "إنجوي" أنا كيّفت أنا وعم جاوب ...فا خِدو فكرة كيف بفكِّر هالرجـَّال بالذات:

1- نكهة العطر التي تفضلها على جسد المرأة: سكر، بهار، أزهار؟
سكر ؟؟؟ بهار ؟؟؟ ولوووووو شو طنجرة مغلي هيي ؟؟؟ إزا هيك بفضل طحينة مع لحسة دبس خروب

2- الجزء الذي تفضّله في جسم المرأة؟
بستحي قول !!! شو قولكن بقول؟؟؟ طيب رح قول: الكوع !!! حدا بقلكن "سفقتني كوع"ـ

3- في حال جاء يوم مُنع فيه استعمال كلمة "أحبك"، ما هو التعبير الذي تستخدمه لتعبّر لها عن مشاعرك وتقول إنك تحبها؟
فطسيك. فطسيك كتير (هاي إزا رايح فيا بالمرة)ـ

4- ما يكون شعورك إذا أخذت هي زمام المبادرة؟
باخود أنا ساعتها حـِمام المراوغة

5- لا تستطيع الاستمرار في علاقتك معها، بأي وسيلة تخلّص عليها؟ (العلاقة طبعا).
بسيارة مفخخة

6- سمِّ عنوان فيلم يصف علاقتك بالمرأة.
خلي بالك من زوزو

7- سمِّ عنوان فيلم تصف به نفسك.
ZOZO - خلص معلق عا أبو الزوز

8- إنّه أول لقاء وجها لوجه معها، في أي مكان يكون؟
مخفر حبيش !!!ـ

9- إلى أي مدى تذهب للحصول على المرأة التي تتمناها؟ (نحن نعتقد أن الرجل بطبيعته لا يملك الجرأة الكافية)..
إلى المدى المنظور والقريب العاجل والمستقبل القريب وعونك جايي من الله وعالصخر منحفر كتائب

10- ما الذي تخافه في ومن المرأة؟
أخاف إنا تقرصني هيي ومطولي ضافيرا أو تسفقني شي كف بقفا إيدا وهيي لابسي خاتم بيشبه تربيعة رينو 12 موديل 74

11- إذا خذلك "..." (اللي هو.. المحروس يعني) مرة أو أكثر، وأكدت لك أنّ الحب يغني عن كل شيء هل تحقد عليها أم تقبل بحبها الجارف؟
لحديت هلق ولا مرة خذلني (يقبرني) بس إزا شي مرة قرر يعمل إعتصام أو عصيان مدني (حلو كنو بينصبلو شي خيمة كمان - كملت) ساعتا بعملو مؤتمر باريس تسعة وستين

12- ما الوجه الذي تحرص على عدم إظهاره أمامها؟
وجهي من بعد ما كون سافق بطن بيض بقورما أو شي ست صحون فول وحمص وتوابعها

13- هل تخاطر بحياتك وتخبرها إذا لاحظت زيادة في وزنها؟
العوزو بالله

14- هل تحبّها لدرجة أن تتذوق طبخها لأول مرة؟
وآخر مرة قبل ما موت بتسمم حاد

15- لقد نسيَت عيد ميلادك، ما تكون ردة فعلك؟؟
بقبرا

16- تكذب عليها عندما: ؟؟
كل يوم وكل ساعة وكل تكة تا ضل عايش عا رواق....ليش في ألذ من الرواق؟؟؟ يا لزيز يا رايق

17- هل تصرّ على تسمية أولادك على اسم أهلك، خصوصاً إذا اسمهم "برعي، حنفي، زليخة، درويشة، خزاعي..."؟
إيه أكيد: باخوس - عساف - إجناديوس - أفتيموس - برطلاماوس

18- هل الرجال أيضاً يغرّهم الثناء؟
ميني هيدي ثناء ؟؟؟ صدرا كبير ؟؟؟؟

19- إنها بداية العلاقة، كم سيستغرقك الأمر لجرّها الى منطقة المحظور؟؟
وزين !!! شو مربع أمني هوي !!! أو مارون الراس؟؟؟

20- هل هشاشة الرجل أشد من هشاشة المرأة؟
ميني هيدي هشاشة ؟؟؟ ما بعرف شوفو ثناء

21- متى آخر مرة بكيت و لماذا؟
آخر مرة بكيت لما إحضرت آخر فيديو كليب لطوني كيوان وبدون ما إلكن لماذا لأن ما بيعود سايعني "لاروس" المسبات 

على شكلو شكشكلو:

12 باب لإستعمال "الكس إختا"ـ 

من دهب

يا سلوى ليش عم تبكي ؟ـ

لما كنـّا زغار كان في غنية إسما يا سلوى ليش عم تبكي ؟ كانت تجاوب سلوى عم ببكي بدي رفيقة ... وبتكمل الغنية وما عدت زاكر باقي الكلمات ...

من شي جمعة زمان، كان في إجتماع لمجلس الأمن بيتعلق بالتحقيقات الجارية بجريمة إغتيال المرحوم الرئيس الحريري وقدم المحقق الدولي سيرج براميتس تقرير عن المستجدات والتطورات بالتحقيق وقال بطريقة ملفتة للنظر إنو في بحدود عشر دول مش عم تتعاون بطريقة كاملة أو جزئية وبيعتقد إنو عندها معلومات فيا كتير تساعد وتسرِّع التحقيق بهالجريمة.
لما سمع هالشي الرئيس الدوري لمجلس الأمن ويلي هوي هلق روسي (حليف سوريا الإقليمي يعني) بيتقدم بطلب لمجلس الأمن لإصدار قرار يسمح لبراميتس بتسمية الدول الغير متعاونة وإجبارها على تقديم المعلومات اللي عندا. فبقوم المندوب الأميركاني (يلي عم بيشدوا ويقدوا منشان المحكمة الدولية) بيستعمل حق النقض (الفيتو) وبيسقط القرار!!!

لما سمعت وقريت عن هالحادثة تذكرت غنية لفنانة لبنانية صبية إسما تانيا صالح، في كتير منكن ما بيعرفوى لأنو مجلة الشبكة/الجرس/نادين ما بتجيب سيريتا لأنو نوع الفن يلي بتتعاطى تانيا هالمجلات مش سامعين فيه أصلاً. حاصلو تانيا صالح كتبت غنية قبل بكتير من 14 شباط 2005 إسما يا سلوى ليش عم بتبكي بتجاوب سلوى عم ببكي عالحقيقة ... مدري ليه دغري خطرت عابالي هالغنية ...
"يا سلوى ليش عم تبكي ... عم ببكي عالحقيقة ... قومي تا نرقص دبكة وعـلـّي صوت الموسيقى"

مين هيي هالدول يلي مش عم تتعاون مع براميتس وشو عندا معلومات معقول تفيدو ... هاي معلومات فيني قلكن ياها لأنو قريت عنـّا من عدة جرايد وتحاليل (أكتريتا أميركانية) أما ليش ما بدا هالدول تعطي هالمعلومات بدنا ننطر شوي تانشوف شو ببيّن:
الولايات المتحدة: عندن صور مأخودة من الأقمار الإصطناعية قبل وبعد حصول الجريمة كما يعتقد إنو عندن معلومات إستخباراتية كتير مهمة.
فرنسا: بعد لهلق ما سمحت السلطات الفرنسية لسيرج برامتيس أو حدن من معاونيه إنو يستجوب محمد زهير الصديق يلي هوي الشاهد "الملك" بهالجريمة.

"الحقيقة مُرّة يا بنتي وإنتي قلبـِك حنون ... لا إسمعتي ولا إقشعتي ... خليكي بلا عيون..."

ألمانيا: يبدو أنو لما السيد ميليس كان هون، كان في معو "حوسة" من جماعة المخابرات الألمانية وهالشبيبة الناهضة جمـَّعِت معلومات لا بأس بها ويبدو كمان إنو نايبو للخواجة ميليس عِمِل السبعة ودمتا بس لمّا فل ميليس ضبضب كل شي وأخدو معو وإلمانيا رافضا إنو تعطي هل المعلومات لبراميتس كما إنا رافضا تسمح إنو براميتس يستجوب نايب ميليس.

"ما ناقصنا معلومات...منحكي بتلات لغات...وساكتين ما أحلانا يسواكي ما يسوانا..."

إسرائيل رافضة تتعاون (أكيد) وأستراليا كمان. إذا بتذكروا كان في ست حجاج إستراليي شباب إنقال إنو إلتقى آثار لمواد متفجرة على كراسي الطيارة يلي كانو راجعين فيها عاإستراليا... يمكن ما خصن ويمكن خصن بس “Tante Ostralia” ما بدا إنو براميتس يحكيون للشبيبة أو يطلع على ملف التحقيقات بالمواد المتفجرة يلي إلتقت عا مقاعد الطيارة. طيب ليش يا إستراليا؟ الله أعلم !!!

"لما تشوفي شواز... حطي فيزا عالجواز...وفلـّي إزا قدرتي...وين نحنا وين إنتي"

السعودية رافضة تعطي معلومات إزا هول الستة الأستراليي كانوا بالحج ولا لاق. وكمان يبدو إنو السعوديين إستجوبو موقوف بلبنان بتهمة إنتمائه للقاعدة وتبين إنو هيدا الشب منتمي لمجموعة شي 12-13 واحد وإنو في منن بيعرفو أحمد أبو عدس وزميلو خالد طه يلي إنشقت الأرض وبلعتو. أكيد السعودية رفضت تفرجي هالملف لصاحبنا سيرج.
الكويت رفضت إنو براميتس يستجوب أحمد Spielberg الجارالله يلي نشر بصحيفة السياسة ماهبّ ودبّ ويبدو إنو في إشيا قالها الصدّيق تتطابق مع معلومات نشرها الجارالله. فا حابين لجنة التحقيق إنو يستوضحوا لـ Steve Austin, the six million dollar man بس الكويت رافضة.
الإمارات ما بدا تقول شي أو تعطي أيّ شي عن الميتشوبيشي !!! العمى ليه ؟؟؟ مع إنو طِلِع من عندن، كمان الله أعلم.
هلق آخراً وليس أخيراً البرازيل ما بدا إنو حدن من لجنة التحقيق الدولية يستجوب الست رنا قليلات لأنو مشغولي عم تتعلم رقص الـ Samba مشان كرنفال الجاي... هلق إزا في رابط بين بنك المدينة وجريمة الحريري مش ضروري سيرج براميتس يعرف فيه...

"الحقيقة اللي قدامك عمرك ما تقوليها... الكلمة اللي عا راس لسانك يا بلعي يا بلعيها..."

بدون شك إنو يلي ضالعين بمقتل الرئيس الحريري بدن يعطلوا المحكمة الدولية بس في حدن يقلي مين وليش عم بعطل عمل لجنة التحقيق ؟؟؟

كنت متوقع كل شي إلا إنو تانيا صالح "تتنبى" عن مصير التحقيق بجريمة إغتيال العصر "تلات" سنين قبل ما تحصل.
الله يرحم كل الشهدا لأنو عن جد: العترة عا يلي بموت.

بالـ 2007

بالإذن من ميشال حايك وسمير طنب وماغي فرح ومن لف لفيفهم في الوطن والمهجر من المنجمين والمتنبين والبصارين والبرَّاجين وضرِّيبت المندل وقرّآء الفنجان وشايفين البخت وعلم الفلك والأبراج والخرزة الزرقة وريشة البوم وتلات شمعات والـ Voodoo واليناصيب واللوتو والتيكو التاك ...
بالإذن منن كلن فرداً فرداً .... إسمحولي زيد على هالحديث المشوّق نتفة توقعات ومقررات من عبدكن الفقير...ما أنا كمان بيجيني صوَّر بالغيب وبشوف روءى...وبما إنو موسم، ليش تا خلّي كل هالتحف مضبوبي ؟ رح إطلع الجمهور عليها لأنو الجمهور "عايز كِدا"

إلي فترة غايب عن السمع لأنو كنت فاتح خط مع "الماورئيات" وعم عبّي تنبؤات وروءى للـ 2007 ناهيك عن شوية مقررات مصمم إني طبقـّن هالسنة. إتفضلوا:

مقررات: بالـ 2007 رح بلش صدق 10% من كلام السياسيين و 5% من حكي الجرايد. لا، هالنسب المئوية مش قليلة إذا بتقارنوى مع نسب الـ 2006.

مقررات: بالـ 2007 رح صدق 100% من نشرات الأخبار لما بيكونوا عم بيخبرونا الأخبار الدولية !!! Sorry بس حتى الـ 5% مش قادر عليها بالـ 2007 مع هالجماعة ... بركي بالـ2008 إنشالله وكل سنة وإنتو وهني سالمين

تنبؤات: بالـ 2007 رح يتجاوز عدد المسلسلات المكسيكية المعروضة على شاشات التلفزيون اللبنانية عدد سكان المكسيك.

تنبؤات: بالـ 2007 رح يتجاوز عدد المسلسلات المصرية المعروضة على شاشات التلفزيون اللبنانية عدد سكان مصر.

مقررات: بالـ 2007 رح جرّب من كل قوتي إنو ما إنتؤ/راجع/إتقيّاء لما بالغلط بسمعلي شي غنية لحيالا حداً من هالمطربين المقلعطين الساحة الفنية

مقررات: بالـ 2007 رح جرّب من كل قوتي إنو ما إنتحر لما بالغلط بحضرلي شي فيديو كليب لحيالا حداً من هالمطربين المقلعطين الساحة الفنية

تنبؤات: بالـ 2007 رح يتجاوز عدد المطربين عدد محلات الفلافل والدجاج المشوي والشورما "مجتمعة" – يا بيي شو رح "نِخلع" بالـ 2007.

تنبؤات: بالـ 2007 رح يتم إنتخاب المدير الفني لشركة روتانا "للصوتيات والمرئيات والمنيّكات" كعضو شرف بالـ Academie Francaise نظراً لعطآته "السمينة" في مجال الفن الراقي

تنبؤات: بالـ 2007 رح يجتمع البرلمان اللبناني ويصوِّت على قانون نظافة الطرقات على الشكل التالي:
بحق لحيالا مواطن لبناني بشوف حدن كبّ شي من شباك السيارة إنو:

1- يكسر عليه ويوقفو

2- يلقطو من شعراتو أو شعراتا ويسحبو من السيارة
3- يقرطو قتلة يفرجي نجوم الضهر الساعة 9:30 عبكرا

يـُعمل بهذا القانون "لمرة واحدة فقط" لكل مواطن ويبدأ العمل به فور نشره بالجريدة الرسمية.

هابي نيو يير.

أشاير من وحي الغيب

صرلي يومين تلاتي مقلقز حاسس في شي بالأفق بس مش عم بعرف شو

وعادةً بجرب بحبـِش بقبـِش تا ولـَّنو آخدلي شي إشارة من شي محل بس ...

ما في شي...منشفي معي عالآخر... يا أنا معمي قلبي يا مش عم بفهم الأشاير

فاليوم قررت ما روح عالشغل وقررت إضهر من بيروت بركي بيروق راسي شوي وبسير شايف أو سامع أكتر

فدوَّرت هالسيارة وبلشت سوق ... بعد شي ساعتين سواقة وصلت عا مدينة كبيرة.

صفيت وإنزلت إتمشى بالسوق.

بعد شي نص ساعة، "محسوبكن" عـِطِش ... فِت عا دكانة زغيري وطلبت وحدة Diet Coke أنا وعم بتدفعلو شفت شغلة محطوطة ورا الدكنجي:

قلتلو: شو هيدا ؟

برم هيك وقلي : صبغة شعر

قلتلو: أكيد إنتي ؟

قلي: ولاو مية بالمية

قلتلو: فرجيني ياه تا شوف

قلي: تكرم عينك ...تفضل

يعني ما بعرف شو بدي قول بس بوضعي النفسي بهيديك اللحظة إعتبرتا إنو هيدي إشارة !!! أسود وسريع المفعول كمان ... الله ينجينا

ضهرت من المحل وبلش الفار يلعب بعبي ...

طلعت بالسيارة وبلشت سوق ... ما لحقت سقتلي شي خمس دقايق بطـَّلع هيك انا وعلقان بالعجقة وبلاقي الآرمة هيدي:

قلت إيه العمى بدينك شو أعمى إنو إذا بظرف خمس دقايق صار جاييك إشارتين يا إبن ألله وإنتي بعدك مُصِّر إنو بدو يصير شي ... خلص يا حبيبي ما في شي ... دوِّر ورجاع من مطرح ما جيت .... قاعد تتفلسف وتحلل وتناقش ... رجاع عالبيت وحاج تسمع أخبار لا من هول ولا من هوليك ... إتروك الأمور لإحساسك وحتى إشعاراً آخر إحساسك عم بقلك إنو الحالة "مأ..."

حلم ليلة ...خريف

بصرت بنومي إني علقان بقلب مسلسل مكسيكي !!! أنا والممثلين منتفاعل مع بعض. بيسمعوني وبيسمعون، بيحكوني وبيحكيون ...

Please ما تواخذوني على بعض التزفير يلي رح يمرق بس عم بنقلكن "وقايع" وبعدن بيكفي إنو واحد يسمع نشرات الأخبار المحلية وتصاريح الوزارا تا أكيد أحلامو ما رح تكون ولا شوي طاهرة !!!

مشهد 1: Don Alekhandro Delgado, Chermoutella, Chlikita

Don Alekhandro Delgado: تبّاً هؤلاء المزارعين الحقيرين يرفضون بيع أراضيهم، يجب أن أسيطر على جميع العقارات ....

تدخل Chlikita مذعورة وثيابها ممزقة ....

Don Alekhandro Delgado: ماذا جرى لكِ يا Chlikita ؟
Chlikita: إنه Don Tablo لقد مزَّق ثيابي وحاول أن يضاجعني !!!

Don Tablo Picasso : Don Alekhandro Delgado

Chlikita: أجل هو بنفسه
Don Alekhandro Delgado: ألم تدافعي عن نفسكِ وشرَفـُكِ ؟
Chlikita: حاولت ... لكنه أغواني هيهيهيهيهيهيييييي
Chermoutella: حااااااااااااا Chlikita إنك لـَحقاً إسمٌ على مسمى
Chlikita: (بكتير لئمنة) ومنذ متى يا ................ Chermoutella يغبرُ الطحان على الكلاس؟
أنا: (محاولاً ترطيب الأجواء)Annnnnhhh في عندكن كلاس بـ مكسيكو ؟
Chlikita و Chermoutella: إخرس أيها اللبناني اللئيم !!!
أنا: (بقلبي) إنشالله تموتي إنتي وياها بإنفلوانزا الطيور !!!

الحاج فتحي!!!: يا واد يا متوّلي دانا عايز أقلك على سر كتمتو عليك تلاتين سنا.... دانا مش أبوك .... أنا مراة خالك !!!!
أنا: ولك يا حااااااااااج عم نحضر مكسيكي شو جابك إنتي بنص هالحشرة ؟
الحاج فتحي: وانا مالي ؟ دانا بحب الفاهيتاس آوي !!!!
Don Alekhandro: حااااااااااااا Don Fat7ello وأنا أجد الفلافل الطعمية جدُ لزيزة !!!
الحاج فتحي: دانا ماشربشي إلا ألمازة ... بلا مواخزة يعني...دول اللبنانيا رايحين ساحبين الكحول من الـ Laziza ويبيعونا بيرة على فراولة وأناناس وميشميش...دانا "كونتي" بحب الميشميش ودي لوقتي بحب المانغا !!!
Don Alekhandro: آسف Don Fat7ello إنما مزارعي في مقاطعة Guadalakhara لا تزرع سوى الخرمى. لدينا خمسة ملايين شجرة خرمى ...
أنا: أكيد يا بابا ... لو ما كل هالخرمى قادرين تعملو مسلسل بـ 12698 حلقة!!!

وفجأة دار الراديو وإسمعت المذيعة عم بتقول إنو المتشاورين فشلوا يلاقو صيغة للحل بس عم بطمنونا كلنا إنو عازمينا إبتداءً من جمعة الجاي على نقفة دين أكلة "خرمى" من يلي بحبا قلبكن

صباح الخير وصحتين سَـلـَف .......

أخطر سؤال

أخطر سؤال اليوم ببيروت، مش أمتين في نزلة عالشارع؟ أو مين عم يقصفنا بالإينرغا؟
لاء،
وكمان السؤال عن تخصيب الأورانيوم والملف النووي الإيراني وكيف السعوديي عم بدبوا وبيعصروا إذا إيران صار عندا القنبلة ...
لاء،
كل هالأسئلة ما فيا خطر عليك يا صاحبي ... الخطر المـُحدق فيك شخصياً هو لما توصل عليك مرتك أو صاحبتك وتسألك:
- حياتي ؟ شايفني نصحاني شوي ؟

يعني شو بدي قلك غير إنو توخى الحيطة والحذر لأنو الكلمات اللي بدك تقولا من بعد هالسؤال فيا تكون مصيرية بالنسبة لإلك ... وبقية حياتك ... لأنو ممكن كتير نقول "البقية بحياتك" لعيلتك وقرايبك... سلامة قلبك.

النصيحة هون إنك تـغـَّير الحديث مع إنو مش مضمونة هالإستراتيجية:
- يا حياتي عرفتي إنو إستقال رامسفليد ؟
- ليش عم بتغـَّير الحديث ؟ (والذعر بادي على وجـّا) والـ Panique رح تبلش تبدي عا وجّك ... (ما قلتلك مش مضموني هالإستراتيجية)

هلق في صيغة للسؤال أخطر من هيك على مقياس ريختر، لما بتوصل "السـِت" من الشغل مثلاً أو الجامعة و"مأنغرا" معا (ما كنت عارف إنو أصول كلمة مأنغرا هيي Angry) وبتسألك:
- ليك ؟ شايفني نصحاني شي ؟
(إنتبه إنو كلمة حياتي صارت "ليك" وناشفة وهال "شوي" يلي فيها وما فيها صارت "شي" ومشروطة ومأكدة وغير قابلة للنقاش)
النصيحة هون إنك تتوجه للطوابق السفلى، لأنو يا حبيبي بدك إتدوق "الواوا" ... وإياك ثم إياك تجيب سيرة هيفا قداما لأنو أكيد رح منروح ناخود بالخاطر ...

قمة الخطر برأيي المتواضع هو لما تكون راجعة من شي ضهرا مع صاحبتا وتشك عليك دغري وتروح سافقتك السؤال العجيب:
- ولـَكْ يا حياتي ليش ما قلتلي إني نصحاني هالقد ؟؟؟
إتروك كل شي من إيدك وإركض عالبلكون وشك عا راسك للباركينغ ... وإذا إنتو عايشين بالطابق الرابع أو الخامس ... مش مهم... تفاصيل هيدي... أنا بأكدلك إنو شو ما بدو يصيبك من بعد الشكة أهونلك بكتير من إنك تجابه هيك سؤال و"تداعياته" ... شو بدك... روح إقعدلك جمعتين تلاتي بغرفة العناية الفايقة وصلي إنـَّا ما تضلا "فايقة" تسألك هالسؤال من بعد ما ترجع عالبيت لفترة النقاهة.

حوار
هيي: طيب ما قلي شوي شو فيي أعمل...ما إنتا درستون هول بإميركا Food Science و Nutrition وشو بعرفني... إنصحني شوي ...
أنا: مش ناقصك نصاحة أأأه Sorry نصايح .......... آآآآآآآآآآخ
هيي: بلا زناختك ... بوجـّْعك ها !
أنا: OK OK أول شي خفيفيلي بطاطا مقلية .... عالترويقة !!! آآآآآآآآآآخ
هيي: جلدك عم يرعاك هيئتو ....
أنا: طيب لازم تتخلصي من الجرة
هيي: أيَّ جرة ؟
أنا: الجرة يلي كل ما دق الكوز فيا بتفتحليك لوح Galaxy ....
أنا: آآآآآآآآآآخ آآآآآآآآآآخ آآآآآآآآآآخ

حـُطـَك عا حـَكي

ليك ... لشو كترت هالحكي كلو ؟؟؟
إنو شفتلك حداً حررّ بلد بالقرّادي ؟ غير زغلول الدامور ما حدا عـِمِلا بعد...
وليك... زغلول الدامور إلو من سنة الـ76 ما راح عالدامور...

ليك إسماع هالغنية وإسماع من يلي عم بتغنيـّا:
صار لازم تـِسكـُت يا عيني !!!

وعا فكرا يلي منكن ما بيعرف شو أو وين النورماندي
هيي مكب زبالة بيروت إيام الحرب وبعدنا لهلق منـََّضـِفْ فيا
لأنو كمان بدو يطلع فيا عمار Super Duper De Luxe
مبروك سلف لأنو بإذن الله وسوليدير ما رح يضل لبنانيي
ببيروت إلا جماعة الباركينغ و"السيكيوريتي" والمدحوشين
بـ Derriere السعوديي.

أبشر ...

الغنية إسما "إلى آخره"، العم بتغني إسما أميمة الخليل، يلي كتب إسمو محمد العبدالله ويلي لـَحَّن عبود السعدي.

بصراحة...ـ

ليكي...بعرف إنو خْلِصنا
وبيناتنا ما بقا في شي...ـ
إلا صداقة تواعدنا إنو نخليها
وعارفين إنو ما رح نغذيها
صعبة الصداقة بعد علاقة غرام
لأنو الغرام ما بينسجم مع الصداقة

وأنا معِك يا ستي...إنو خِلِص الغرام
مدري خِلِص الحب ...ـ
في شي خِلِص أكيد ومني عارف شو هوي...ـ

بس بدِك للصراحة؟ـ
إشتقت لَ شفافِك

إشتقت لَ شفافِك
لأنو رجعت إقرا شِعِر
كان إلي زمان ما إقريت شِعِر
ويمكن ما بتعرفي إنو لما كنّا سوى
كنت إقرى شِعِر...تا إهرب مِنِك
ومن جَماعتِك...ومن مُجتمَعِك المُخملي
يلي كل هاللبنانيي طاحشين تا يصيروا منو
ومنن عارفين شو بيحوى...ـ

منن شايفين إنو ما في شي...ـ
فوفاش...ـ
في شوية مصاري...ـ
بس طِلِع عالساني شَعِر وأنا
قلِك إنو المصاري ما بتعمِل عالم!!!ـ

واللذة إنو كلكن اللهاويّي

وما بتأفوا قدّاس

ولا جناز ولا زيّاح

وما بتاكلو لحمة الجمعة

وسبع كنايس و تنعشر مزار

وستين ضربة سخنة...ـ
وما بتعبّروا شحّاد أو ولد عم بِ بيع "شيكلتس"ـ

ولِكْ بتعرفي...ـ
قفولكُن شي قداس
و"شِخّوا" عا إصبع مجروح!!!!!!!!!!!ـ