هاي قصتنا...بس بدك مين يفهم



مقاومة الإنحلال: أمرّ بإسمكي

مقاومة الإنحلال: سمرا يمّ عيون وسّاع

ما في أحلى من أنو تلاقي بأرشيفك غنيّة ما تكون سامعا من قبل، وبتكتشف إنا للمؤلف/الملحن يلي إنتا بتعبدو (عاصي الرحباني) وإنو نمط الغنية نمط إنتا كمان بتعبدو (زجل) فا إنجوي:ـ

سمرا يمّ عيون وسّاع / والتنورة النيليّة

المطرح ضيّق ما بساع / رح حطِّك بعيّنيّي

على شكلو شكشكلو

يا جارة زعلتي عليي

مقاومة الإنحلال: الوصية - شعر نزار قباني موسيقى غازي عبد الباقي

من ألبوم بلاغ رقم واحد لغازي عبد الباقي

بنت الشلبية

بنت الشلبية كما لعبتها فرقة بند جزائي في مهرجان بيروت للموسيقى والفن 2011

Photo Courtesy of Ms. Boushra Kanj

مقاومة الإنحلال: كتبولي حُبِك

من مسرحية الوصية لمنصور الرحباني

L'homme qui a perdu son ombre. مقاومة الإنحلال:ـ

لتوفيق فروخ من ألبوم درَبزين

مقاومة الإنحلال : أصنام العرب

Quotable Quote:

صارلن شي مية سنة ما ربحوا العرب

مية سنة ملقوحين بقصور الدهب

مية سنة مرتاحين. لا القدس ولا فلسطين

عملو عندن شي صحوة أو صرخة غضب

مقاومة الإنحلال: تركني الليل

تركني الليل وراح يرتاح...وأخد نومي معو

لشربل روحانا من ألبوم خطيرة

تحية إلى منتظر الزيدي والشعب العراقي

قدام عسكر طايف عليي
ودعسات تهدر...والمدافع نار
وقدام حاكم بيرقو مفـّيي
حولو جيوش والسيوف كتار
بعلن بصوتي...بشوق عينيـّي
بإيدي المشتاقة لمحو العار
حيفي العدوّي قول غنيّة
وحدا لأرضي بتلبق الأشعار

غناء نصري شمس الدين من مسرحية جبال الصوان للأخوين رحباني

مقاومة الإنحلال: بعدك بتذكر يا وطى الدوّار

الراعي حـَكـَم كرمستان

قولولا لَ ستّ الحسن
الراعي حكم كرمستان
يا حلوة لا تنغشي ...ما كلن كانوا رعيان

قولولا لَ ستّ الحسن
المجّوز عم بـِ نوح
يندهنا وياخدنا اللحن
بهالصوت المبحوح
قولولا الراعي الطيّوب
مدودخ ماشي بالمقلوب
مش سكران من المشروب
من لفتة عينيك سكران

من مسرحية "حكم الرعيان" لمنصور الرحباني

إسمعولي هالقطشة: وفد ...وفد

كنت حابب علـّق على كل هالموفدين والوفود يلي أتحفونا بوجودن وبتطميناتن إنو "ولا يهمكن" رح يكون في رئيس وبالمهلة الدستورية كمان....وكان كلو كلام بكلام فا حابب إهديكن هالقطشة من مسرحية "يعيش يعيش" للأخوين رحباني
وكمان حابب إهدي هالقطشة لكل يلي "مجهزين" البروايز وناطرين مين بدو يكون الرئيس تا دغري يعلقوا الصور .... الدني مع الواقف ...ولو كان ......ـ

Quotable Quote:
الجوقة: ويلي سلاحو ظاهر يا جناب الشاويش ؟ـ
الشاويش : يلي سلاحو ظاهر ....ما بدو تفتيش

هالحديث صار من 35 سنة ...بشرفي .... يلعن الكازب.... وبشرفي ما تغيّر شي .... ولشو التغيير!!!!!ـ

مزاج علني: يا معلمة

من مسرحية أبو الطيب المتنبي لمنصور الرحباني

Quotable Quote: سألت عن سحر العيون ...قالو في عينيكي إحتمى

مقاومة الإنحلال: بيسان - القدس في البال - 1972- فيروز

غراميات وسياسة ؟؟؟ ما بتركب ...ـ

جو: آلو ... آلو ... ولك كيفك يا زلمة وينك مختفي ؟؟؟
أنا: أهلاااااااااااااان بـِ جو ... مشتقلك !!! أنا منيح ... والله عم بشتغل بآخر ما عمّر ربنا !!!
جو: شفناك هيداك النهار بالجميزة...كنا أنا و"سابين" عم نتعشى...شفناك قاعد إنت ووحدة أمّورة ... مين هاي وليه؟
أنا: إتعرفنا عا بعض بالشغل ... فا بتعرف أنا كيف !!! دغري لازم يصير في "خبز وملح" ... عزمتا عالعشا...وبصراحة عجبتني كتير
جو: أنا ما كتير شفتا منيح بس سابين قالت إنا كتير حلوة وجسما حلو كمان !!!
أنا: مبلا ... بتسبح كل يوم قال بالقليلة نص ساعة وبتلعب "سكواش" !!!
جو: شو مربى إنكليز هيئتا ؟؟
أنا: لا. بس عملت MBA بـِ شيكاغو وهونيك إتعلميت تلعب سكواش
جو: شووووووو .........
أنا: إيه إيه فهماني البنت ... بعدان عجبني إنو هيك بعدا عالطبيعة: ماكياج كتير خفيف، وبلا fond de teint وما أدراك ما هو الـ fond de teint؟؟؟ ... لون شعر طبيعي، ومش عاملي منخارا ولا نافخا شفافا ...
جو: وسيليكون ؟؟؟
أنا: يحرق دينك ملا جو !!! ما إتطلعت ................. مبلا سرقت نظرا عالسريع !!! ما بظني في سيليكون ... مش "ستيلا" أصلاً.
جو: شو بتعمل بالحياة طيّب ؟
أنا: قلتلك عاملي MBA وعم تشتغل مع الأمم المتحدة بمشاريع إعادة إعمار الجنوب
جو: أوكي ... وبرات الشغل عندا إهتمامات شي ؟
أنا: إيه بتحب الـ Jazz !!! ما زال عندا كل الـ Serie تبع Blue Note Jam Sessions
جو: شوووووو .... Melomane الإخت !!!
أنا: عا تقيل ....
جو: يخرب زوقك وين بتلاقيهن هيك نسوان ؟؟؟
أنا: شايف ..... بس ....هممممم
جو: بس ؟؟؟ بس ؟؟؟ بس شو ؟؟؟ في بس ؟؟؟
أنا: ولك روق يا زلمي ... إيه في بس ... طلعت بتحب الحياة !!!!
جو: شو عم تحكي ؟؟؟
أنا: متل ما عم تسمع ....
جو: يحرق سماك عا هالخبرية
أنا: عجبك ملا فقسي !!!
جو: شو رح تعمل طيب ؟؟
أنا: شو بدي أعمل ... خلص إنسيا ...
جو: ولك معقول راسك إنتا كمان ... بتطـّير وحدة هيك من إيدك ... طيب ما خففلي من سياستك كمان إنتا !!!
أنا: مش قادر يا خيي ... مش قادر ... هالمحوّر تبع الشر هالكني
جو: هلق إنتي بمحوّر الشر ؟؟؟
أنا: إيه منك عارف ؟؟؟ وبقوى الظلام كمان
جو: إنتي قوى ظلام ؟؟؟؟؟؟؟
أنا: أكيد ... شو بيك دخلك ؟؟
جو: والله مش عارف ...
أنا: إيه "الظلام" عليكم ورحمة الله وبركاته إزا هيك .........

الغنية: غنية عاطفية
العم بغـّني: خالد الهبر
Quotable Quote: يا إختي القصة كبرت ما عاد فيي حـِبّ ... قصة وعي سياسي مش قادر إني حـِبّ ...حُبي هوي الجماهير وغرامي القضية ... صيري إنتي الجماهير والفئات الشعبية ... تا إكتبلك غنية ... غنية عاطفية ...

يا سلوى ليش عم تبكي ؟ـ

لما كنـّا زغار كان في غنية إسما يا سلوى ليش عم تبكي ؟ كانت تجاوب سلوى عم ببكي بدي رفيقة ... وبتكمل الغنية وما عدت زاكر باقي الكلمات ...

من شي جمعة زمان، كان في إجتماع لمجلس الأمن بيتعلق بالتحقيقات الجارية بجريمة إغتيال المرحوم الرئيس الحريري وقدم المحقق الدولي سيرج براميتس تقرير عن المستجدات والتطورات بالتحقيق وقال بطريقة ملفتة للنظر إنو في بحدود عشر دول مش عم تتعاون بطريقة كاملة أو جزئية وبيعتقد إنو عندها معلومات فيا كتير تساعد وتسرِّع التحقيق بهالجريمة.
لما سمع هالشي الرئيس الدوري لمجلس الأمن ويلي هوي هلق روسي (حليف سوريا الإقليمي يعني) بيتقدم بطلب لمجلس الأمن لإصدار قرار يسمح لبراميتس بتسمية الدول الغير متعاونة وإجبارها على تقديم المعلومات اللي عندا. فبقوم المندوب الأميركاني (يلي عم بيشدوا ويقدوا منشان المحكمة الدولية) بيستعمل حق النقض (الفيتو) وبيسقط القرار!!!

لما سمعت وقريت عن هالحادثة تذكرت غنية لفنانة لبنانية صبية إسما تانيا صالح، في كتير منكن ما بيعرفوى لأنو مجلة الشبكة/الجرس/نادين ما بتجيب سيريتا لأنو نوع الفن يلي بتتعاطى تانيا هالمجلات مش سامعين فيه أصلاً. حاصلو تانيا صالح كتبت غنية قبل بكتير من 14 شباط 2005 إسما يا سلوى ليش عم بتبكي بتجاوب سلوى عم ببكي عالحقيقة ... مدري ليه دغري خطرت عابالي هالغنية ...
"يا سلوى ليش عم تبكي ... عم ببكي عالحقيقة ... قومي تا نرقص دبكة وعـلـّي صوت الموسيقى"

مين هيي هالدول يلي مش عم تتعاون مع براميتس وشو عندا معلومات معقول تفيدو ... هاي معلومات فيني قلكن ياها لأنو قريت عنـّا من عدة جرايد وتحاليل (أكتريتا أميركانية) أما ليش ما بدا هالدول تعطي هالمعلومات بدنا ننطر شوي تانشوف شو ببيّن:
الولايات المتحدة: عندن صور مأخودة من الأقمار الإصطناعية قبل وبعد حصول الجريمة كما يعتقد إنو عندن معلومات إستخباراتية كتير مهمة.
فرنسا: بعد لهلق ما سمحت السلطات الفرنسية لسيرج برامتيس أو حدن من معاونيه إنو يستجوب محمد زهير الصديق يلي هوي الشاهد "الملك" بهالجريمة.

"الحقيقة مُرّة يا بنتي وإنتي قلبـِك حنون ... لا إسمعتي ولا إقشعتي ... خليكي بلا عيون..."

ألمانيا: يبدو أنو لما السيد ميليس كان هون، كان في معو "حوسة" من جماعة المخابرات الألمانية وهالشبيبة الناهضة جمـَّعِت معلومات لا بأس بها ويبدو كمان إنو نايبو للخواجة ميليس عِمِل السبعة ودمتا بس لمّا فل ميليس ضبضب كل شي وأخدو معو وإلمانيا رافضا إنو تعطي هل المعلومات لبراميتس كما إنا رافضا تسمح إنو براميتس يستجوب نايب ميليس.

"ما ناقصنا معلومات...منحكي بتلات لغات...وساكتين ما أحلانا يسواكي ما يسوانا..."

إسرائيل رافضة تتعاون (أكيد) وأستراليا كمان. إذا بتذكروا كان في ست حجاج إستراليي شباب إنقال إنو إلتقى آثار لمواد متفجرة على كراسي الطيارة يلي كانو راجعين فيها عاإستراليا... يمكن ما خصن ويمكن خصن بس “Tante Ostralia” ما بدا إنو براميتس يحكيون للشبيبة أو يطلع على ملف التحقيقات بالمواد المتفجرة يلي إلتقت عا مقاعد الطيارة. طيب ليش يا إستراليا؟ الله أعلم !!!

"لما تشوفي شواز... حطي فيزا عالجواز...وفلـّي إزا قدرتي...وين نحنا وين إنتي"

السعودية رافضة تعطي معلومات إزا هول الستة الأستراليي كانوا بالحج ولا لاق. وكمان يبدو إنو السعوديين إستجوبو موقوف بلبنان بتهمة إنتمائه للقاعدة وتبين إنو هيدا الشب منتمي لمجموعة شي 12-13 واحد وإنو في منن بيعرفو أحمد أبو عدس وزميلو خالد طه يلي إنشقت الأرض وبلعتو. أكيد السعودية رفضت تفرجي هالملف لصاحبنا سيرج.
الكويت رفضت إنو براميتس يستجوب أحمد Spielberg الجارالله يلي نشر بصحيفة السياسة ماهبّ ودبّ ويبدو إنو في إشيا قالها الصدّيق تتطابق مع معلومات نشرها الجارالله. فا حابين لجنة التحقيق إنو يستوضحوا لـ Steve Austin, the six million dollar man بس الكويت رافضة.
الإمارات ما بدا تقول شي أو تعطي أيّ شي عن الميتشوبيشي !!! العمى ليه ؟؟؟ مع إنو طِلِع من عندن، كمان الله أعلم.
هلق آخراً وليس أخيراً البرازيل ما بدا إنو حدن من لجنة التحقيق الدولية يستجوب الست رنا قليلات لأنو مشغولي عم تتعلم رقص الـ Samba مشان كرنفال الجاي... هلق إزا في رابط بين بنك المدينة وجريمة الحريري مش ضروري سيرج براميتس يعرف فيه...

"الحقيقة اللي قدامك عمرك ما تقوليها... الكلمة اللي عا راس لسانك يا بلعي يا بلعيها..."

بدون شك إنو يلي ضالعين بمقتل الرئيس الحريري بدن يعطلوا المحكمة الدولية بس في حدن يقلي مين وليش عم بعطل عمل لجنة التحقيق ؟؟؟

كنت متوقع كل شي إلا إنو تانيا صالح "تتنبى" عن مصير التحقيق بجريمة إغتيال العصر "تلات" سنين قبل ما تحصل.
الله يرحم كل الشهدا لأنو عن جد: العترة عا يلي بموت.

ينعاد عليكي

ينعاد عليكي...كل يلي بدي قولو موجود بالغنية
مع فرق كتير بسيط: سلامي "صار" معي

وضعي النفسي حاليـًا

لمن يهمه الأمر، فيكن تاخدو فكرة عن وضعي النفسي حاليـًا بالإستماع إلى هذه "القطشة" ـ
هلق لَ يلي ما بيهمن الأمر، فيكن تضلو عم تحضروا نشرات الأخبار كل واحد منكن حسب لمين بـِزَقـِف

عشتم وعاش لبنان

ملاحظة: الأغنية مهداة لكل واحد في مسلة تحت باطو وعم بتبلـِش تنعرو...صحتين سلف.

أغنيتي المـُفـَضَلة

أغنيتي المفضلة في كل زمان ومكان....إنجوي