مقاومة الإنحلال: كتبولي حُبِك

من مسرحية الوصية لمنصور الرحباني

من عاصي لفيروز

بالذكرى الـ 24 لغياب عاصي الرحباني، إنكتب كتير مقالات وإتخبر كتير خبار، خصوصي بظل هالمعمعة بين فيروز وورثة منصور الرحباني. بس في قصة لفتتلي نظري كتير وخبـّرها فايق حميصي يلي كان عايش مع عاصي الرحباني بفرد بيت لحين وفاتو. وأكد حميصي إنو عاصي كان لآخر تكة ناطر إنو يدق الباب وتجي فيروز لعندو عالبيت وإنو كان مشتقلها كتير ...ـ

فا إرجعت عا هالأرشيف وعا مسرحية "المؤامرة مستمرة" (آخر مسرحية لعاصي وهوي طيب) تا فتش عا أي دليل يأكد شو خبّر فايق حميصي...ولقيت هالزجل الرائع ويلي بيّن قديش بالفعل هالزلمة كان مشتاق يرجع يلتقي بالمرا يلي لا شك إنو جسـّدت أو قولبت عبقريتو بطريقتا وموهبتا يلي ما بظن إني أنا قادر أوفيا حقا ...ـ

يا جارة إزعلتي عليي وشو بيرضيكي ؟
متل ما صاير فيي صاير فيكي


غادي من عندن غادي الصوت الموجوع
يغلغل بصخور الوادي ويرد رجوع
بحلفلـِك لما بنادي وعينيي طلوع
بسمي الله وبلادي وبسمّيكي


يا حلوة اللي هجرتينا ونحنا جيران
ليالي الحب ليالينا راحو ضيعان
ويا ما إكتبنا بماضينا عنـِك قصدان
شمـّتي الكوّرس فينا والدبيكـّي


لافي تحت الصفصافة طير الميي
والحلوة عم بتجافي شوي شوي
بشهـّد هاليل الصافي وندر عليي
لأقصد مار عبدا حافي تا راضيكي

المغنون بحسب الدور: جوزيف ناصيف، رونزا، جوزيف عازار.ـ

مقالات مماثلة

في الذكرى الرابعة والعشرين على غياب عاصي الرحباني

هيدا الحديث إنحكى سنة 1990 بالذكرى الرابعة لغياب عاصي. وهاي شقفة من الحديث يلي هوي أطول من هيك بكتير.ـ

بس هالشقفة بالذات لازم نسمعا ونضل نسمعا بركي منفهم بقا.ـ

البطل مات...والسياسي فات

كتير بيعجبني هالحديث

بين سطورو في كتير معاني مخبايي

وكنت ناطر إني حطو بيوم ما يصادف ذكرى "شي" بهالبلد

يلي كل يوم لازم يكون ذكرى شهيد أو إنتفاضة أو عيد شي قديس أو نبي

بعتقد إنو اليوم 21 شباط يوم "عادي" يا أخي

مش ذكرى شي مجزرة أو شي طحشة أو شي عيد بلا طعمة غير إنو لازم

العالم تصرف مصاري وتستهلك عا إشيا أكيد ما إلها لزوم وآخرتا بالزبالة

الحديث من مسرحية المحطة للأخوين رحباني

دور الحرامي : أنطوان كرباج
دور الشحاد : سامي مقصود

صحيح أنتَ بطل أكتر مني...بس أنا سياسي أكتر منك،
وتنايناتن السياسي والبطل لازمين لمصلحة الوطن

مشاهدات من مقاهي بيروت

صرلي فترة، تا إهرب من عجقة السير من بعد الشغل ، بروح بقعد بقهوة ببيروت ....منو منشربلنا فنجان قهوة عرواق ومنو منقرا شوية جرايد ولاحقين نسرّب عالبيت بتكون خفت عجقة هالسير شوي .... من بعد كم يوم عهالمنوال صرت لاحظ يا أخي إنو هالقهوة العم روح عليا فيها شي بروس شي بلا روس...شي بيجنن يعني....قلت خيي خلني غيّر قهوة... خلني روح عا تاني ميلي من بيروت بركي التوزيع الطائفي هونيك بكون أرحم.... بس عبس... هالقهوة كمان ملياني "عباقرة مساطيل" فقلت صرلي فترة ما عملنا شي عا هالبلوغ.... فا بلوغ يا صبي وعمول شي للبلوغ !!! هونيك ليلة أنا ومسرّب حاطط الأيبود "شافل" بتمرق هالقطعة للرحباني.... فا ما في لزوم زيد شي أنا... تاري كانت تصير معو حتى قبل أيام الحرب الـ75.... كيف حاملي هالبلد هالقد فنانين وعباقرة ما بعرف...بس إذا رح منكمل هيك ما عاد فيني إشرب قهوة إلا بمطبخي

Quotable Quote: أفلاطون فايت....أفلاطون ضاهر

إنتخابيات: جزء رابع وأخير

من مسرحية ناس من ورق للأخوين رحباني
وشو كان معهن حق الأخوين رحباني وجبران: قصقص ورق ساويهن ناس (مدري نواب).... وما الناس سوى سطور كتبت.... لكن بماء

إنتخابيات جزء تالت: موتى ومصاري

من مسرحية ناس من ورق للأخوين رحباني

مسرح البيكادللي 1972

ديب (وليم حسواني) مدير الفرقة (نصري شمس الدين)ـ مع دور صغير

لأبو سليم !!!!ـ

إنتخابيات: جزء ثاني والحبل عالجرار

من مسرحية لولو للأخوين رحباني، لولو(فيروز)، البوياجي (نصري شمس الدين)، المرشح فارس بيك (جوزيف صقر)

خلفية: لولو إنحبست 15 سنة وطلعت بريئة...فقررت بما إنو دافعا حق جريمة سلف إنها تقتل حدا... فبتطلب من البوياجي إنو يعمل "ليستا" بأسامي يلي خرج يتصفـّوا

Quotable Quote:
لولو: ... ويدبرك بشي وزارة مدهنة
المرشح: وهي آخرةُ صالحة وكنزٌ لا يفنى

إنتخابيات: جزء أول ومش أخير

من مسرحية ناس من ورق للأخوين رحباني، ولذتا ما بدا تعليق...ـ

مبروك يا إخوان ... إنحلت

متى ما فاتوا العرب بالدّق...خلص... ما حدا يعتل همّ...لأنو محلولة

من مسرحية الأخوين رحباني "المؤامرة مستمرة" 1986

من الأرشيف .... ومن وحي هالأوضاع

العم يحكي إسمو عبدالله النبوط وهو من مسرح الساعة عشرة يلي كانت أهم فرقة مسرحية بالسبعينات.ـ
الحديث عن أحداث عين الرمانة والشياح بالـ 75ـ
أيضاً وأيضاً الحديث من 33 سنة بس مدري لي يا أخي ما حدا عم يتعلم شي من هالتاريخ
كلنا شاطرين بالـ Math أجلكن وما منقلل عقلنا عالتاريخ لأنو التاريخ ما بيطعمي خبز!!!!ـ

إسمعولي هالقطشة: وفد ...وفد

كنت حابب علـّق على كل هالموفدين والوفود يلي أتحفونا بوجودن وبتطميناتن إنو "ولا يهمكن" رح يكون في رئيس وبالمهلة الدستورية كمان....وكان كلو كلام بكلام فا حابب إهديكن هالقطشة من مسرحية "يعيش يعيش" للأخوين رحباني
وكمان حابب إهدي هالقطشة لكل يلي "مجهزين" البروايز وناطرين مين بدو يكون الرئيس تا دغري يعلقوا الصور .... الدني مع الواقف ...ولو كان ......ـ

Quotable Quote:
الجوقة: ويلي سلاحو ظاهر يا جناب الشاويش ؟ـ
الشاويش : يلي سلاحو ظاهر ....ما بدو تفتيش

هالحديث صار من 35 سنة ...بشرفي .... يلعن الكازب.... وبشرفي ما تغيّر شي .... ولشو التغيير!!!!!ـ

إسمعولي هالقطشة: كاسك خيي برهوم

المسرحية: "يعيش يعيش" للأخوين رحباني سنة 1972

الفحوى: يسقط إمبراطور "ميدا" في إنقلاب ويهرب إلى قرية حدودية ويختبىء في دكانة جدّها لـ "هيفا" (فيروز) (مين كان بيقول إنو رح نستعمل إسم فيروز وهيفا بفرد جملة!!!!!ـ )

يدّعي الإمبراطور أن إسمه برهوم وهو ضارب مرتو وحماتو ويريد التواري عن الأنظار لحين إصطلاح الأمور.ـ

ملهب (أنطوان كرباج) هو مهرب بين حدود البلدين يتردد بين الحين والآخر على دكانة بو ديب (نصري شمس الدين وجدّ هيفا)ـ بو ديب فنـّاص كبير يطلب من هيفا أن تلفت نظره حين تكون كذبته "طخينة" فيخففها شوي، حديثهما في نهاية "القطشة" كتير مهضوم. ـ

هالقطشة إنعملت من 35 سنة وكأنو ما تغيّر شي ..... أبشر و"إنجوي" ـ