من الأرشيف .... ومن وحي هالأوضاع

العم يحكي إسمو عبدالله النبوط وهو من مسرح الساعة عشرة يلي كانت أهم فرقة مسرحية بالسبعينات.ـ
الحديث عن أحداث عين الرمانة والشياح بالـ 75ـ
أيضاً وأيضاً الحديث من 33 سنة بس مدري لي يا أخي ما حدا عم يتعلم شي من هالتاريخ
كلنا شاطرين بالـ Math أجلكن وما منقلل عقلنا عالتاريخ لأنو التاريخ ما بيطعمي خبز!!!!ـ

إسمعولي هالقطشة: وفد ...وفد

كنت حابب علـّق على كل هالموفدين والوفود يلي أتحفونا بوجودن وبتطميناتن إنو "ولا يهمكن" رح يكون في رئيس وبالمهلة الدستورية كمان....وكان كلو كلام بكلام فا حابب إهديكن هالقطشة من مسرحية "يعيش يعيش" للأخوين رحباني
وكمان حابب إهدي هالقطشة لكل يلي "مجهزين" البروايز وناطرين مين بدو يكون الرئيس تا دغري يعلقوا الصور .... الدني مع الواقف ...ولو كان ......ـ

Quotable Quote:
الجوقة: ويلي سلاحو ظاهر يا جناب الشاويش ؟ـ
الشاويش : يلي سلاحو ظاهر ....ما بدو تفتيش

هالحديث صار من 35 سنة ...بشرفي .... يلعن الكازب.... وبشرفي ما تغيّر شي .... ولشو التغيير!!!!!ـ

قبل أن ...... ـ

الموسيقى الخلفية إسما "غنج" لمارسيل خليفة من ألبوم"caress"

من دهب !!!!!!!!!!!ـ

الموسيقى الخلفية إسما "قبل الضهر" من تأليف علي نصار موجودة بألبوم تطبيع

لعـيونـِك

الموسيقى الخلفية إسما Tagada Dance لتوفيق فروخ من ألبوم Ali On Broadway

سكر بنات وشـِعـِر للشـَعر

السلام عليكم. ما بظني بكون عم بفضح أسرار إذا قلتلكن إنو 99.93% من الشبيبة يلي حضرو فيلم سكر بنات صار معن حالات (حتماً) من "التريُّل" الشديد بس شافو الست فوق بالصورة. حتى داعيكم يلي مصاب بنشاف بالريق إلو فترة أحس ببعض عوارض التريـُّل يلي سرعان ما تحوّلت إلى همدرة لقصيدة كنت أعرفا من زمان وما كنت مقدرلو ياها لشاعري المفضل والأهضم أسعد سعيد إلا لما حضرت الفيلم و"صـُعقت" لما قصّولا شعرا. وصرلي جمعة هالقصيدة ما عم بتحّل عني فا رح حطّا هون وإتركا بركي هيي بتذوق وبتتركني ....ـ

شو عمـِلت مع حلاق شعرِك يا ترى
تا قصّر وقصّ وعـِمـِل هالمجزرة

شَعرِك الكتبتو قصايد تـِنقرى
بعطر القناني مش بحبر المحبرة

وكانت بطولو الريح هيي وطايرة
إتضييع وما تعرف لوين مسافرة

خصلاتك العليهن مقص إفترى
عمرن عُمر حبي إلـِك يا مغندرة

مربّـيهن وبعرف أساميهن منيح
وقاطع بإيدي لكل شعرة تذكرة

أحاديث من وحي هالوضع

(1)
قالتلي:
- ما بظني إنك بتحبني !!!
- كيف يا حياتي، معقول ، شو هالحكي؟ بحبك ونص .... وزايد واحد كمان
- ما أسألك !!!
-----------------------------------------------------------------------

(2)
- يا إمي ما صار لازم تفكر ترجع تتجوّز ؟ أمتين مفكر تتجوّز؟
- يلا بعد شي تلتين الساعة ...
- كيف ؟
- ما مختلفين عالنصاب ؟
- النصيب؟
- لاه يا Mom ... النصاب ... النصاب
- طفي هالكمبيوتر وقوم شراب معي فنجان قهوة ...
- بدنا ياها توافقية بعدين... بلا زغرة بمقامك ...
- ما تكون متكل عليي بشي مبادرة ؟؟؟
- العوزُ بالله ... بيعرفوا فيا الأميركان بتطلع طبختنا بحص
- سكبلي قهوة سكوب
-------------------------------------------------------------------------

(3)
- ليك، إذا ما صار في نصاب شو بيعملو ؟
- بياخدو Viagra !!!
- أياهن؟؟ جامـِعتنا وللا جامعتن ؟؟
- شو فارقا ما رح تاكول الخازوق عالميلتين ... آخدين فياغرا عم قلك ... في حدا رح ينقرط !!!
- مين ؟
- مين قولك ؟ (إختك ما أهبلك ... قلتلو بقلبي)

خلصنا، ولكن ... ـ

لَ يلي منكن بيعرفو الحقير صاحب هذه المدوّنة شخصياً ... بيعرفوا إنو هوي مُطـَّلق منذ حوالي سنة و"نيف"
فعلياً تم الإنفصال من سنة ونص إنما مبدئياً وعلى الورق مبارح من يومين تا "أخلي سبيل الموقوفين" ...
وكنت مقرر إنو هالمرحلة من حياتي صارت ورايي وإنو ما رح فكـّر إلا بالإيام الجايي وإتعلـّم من الأيام اللي مرقت ... بس لما قريت السبب اللي إتكلت عليه المحكمة الروحية لإبطال الزواج حسيـّت بمرارة مصحوبة بكتير كتير من السخرية ....

تا نحطّ الأمور شوي بنصابا كان القرار بالإنفصال متبادل وإعذروني عن عدم ذكر الأسباب الحقيقية (ولا ما خِنِت متل ما بعض الخـُبَسا لتلتوا وهيي كمان ما خانت) لأنو إتفقنا إنو إتضل الأسباب الحقيقية بيناتنا وبالفعل ضلّت لحديت هلق بيناتنا وأنا ما رح غيّر بالإتفاق ... إتوافقنا وترافقنا وكمان إتوافقنا وتفارقنا .......

بس لا ... بالقانون الكنسي ما فيكن تتوافقوا تا تتفارقو !!! لازم واحد من الشريكين يتشكى عالتاني وإلا ما بتصير !!!
لما خبـّروني هالـ"بلوتيكا" دغري قلتلن أنا ما بدي إشتكي عا حدا خليون هني يشتكوا... اكيد جماعتي طارو عقلاتن بس ما تركنا مجال للنقاش ...

فا إتقدم المحامين تبع ال "ex" بدعوى ضد حضرة جنابي لقاضي بالمحكمة الروحية وحكملن جنابو وأتحفوني بالسبب المقدم: (الفقرة التالية مأخوذة حرفياً من الدعوى)

حصل التعارف بين المتداعيين بحكم متابعتهما لتخصصهما الجامعي في الولايات المتحدة الأميركية وقد نشأت علاقة صداقة بينهما تخللتها الكثير من فترات الإنقطاع لأسباب تتعلق بوضع كل منهما الخاص.
لم يكن المـُستدعى ضده (يعني أنا) يخفي خلال فترة التعارف رأيه الخاص بالزواج وقد تأثر بالعادات والتربية والأفكار التحررية السائدة في الولايات المتحدة الأميركية حيث تابع تخصصه الجامعي، فالزواج بالنسبة إليه عقد كسائر العقود يتوقف إستمراره على نجاح الحياة المشتركة ويدوم بدوام التفاهم والإنسجام بين الزوجين من هنا كان الدافع إلى التلجئة من قبله. (ما بعرف شو يعني تلجئة وما بدي أعرف)

عا فكرا ما حدا منن سألني شي بهالخصوص قبل ما يقدمو الدعوى فكنت متفاجىء بهالسبب ومتل ما قلت حسّيت بمرارة لِحقتا كتير سخرية وقررت إبعتلو مكتوب للمحامي تا "صححلو شوي بالمعلومات" عا إساس إنو إعتبر الأفكار التحررية والعادات والتربية جبتون من أمريكا فا كتبتلو قلو إن وحياتك ما نطرت تا روح عا أميركا منشان الأفكار التحررية والعادات اللوقة وإنو أهلي كفـّوا ووفـّوا بالأفكار التحررية وأنا بعدني بلبنان وكنت بعدني عالـ "cerelac" أجّلـَّك ... وإنو جدي عطاني كتاب "كفر وإيمان" لخليل روكز وكنت بعدني بالـ" Quatrième" وإنو إيه مظبوط الزواج بالنسبة لإلي مش عقد ... بل شغلي أعمق من هيك بكتير... لأنو إذا بدي إستأجر سيارة بدا عقد أو جيب عامل أجنبي بدا عقد ... بس تا شارك حدن بحياتي بدا أكبر وأعمق من عقد ... وختمت المكتوب بقصيدة من كتاب كفر وإيمان إسما "قالو أنا كافر"

ما بعت المكتوب ...

مزاج علني: يا معلمة

من مسرحية أبو الطيب المتنبي لمنصور الرحباني

Quotable Quote: سألت عن سحر العيون ...قالو في عينيكي إحتمى

إسمعولي هالقطشة: كاسك خيي برهوم

المسرحية: "يعيش يعيش" للأخوين رحباني سنة 1972

الفحوى: يسقط إمبراطور "ميدا" في إنقلاب ويهرب إلى قرية حدودية ويختبىء في دكانة جدّها لـ "هيفا" (فيروز) (مين كان بيقول إنو رح نستعمل إسم فيروز وهيفا بفرد جملة!!!!!ـ )

يدّعي الإمبراطور أن إسمه برهوم وهو ضارب مرتو وحماتو ويريد التواري عن الأنظار لحين إصطلاح الأمور.ـ

ملهب (أنطوان كرباج) هو مهرب بين حدود البلدين يتردد بين الحين والآخر على دكانة بو ديب (نصري شمس الدين وجدّ هيفا)ـ بو ديب فنـّاص كبير يطلب من هيفا أن تلفت نظره حين تكون كذبته "طخينة" فيخففها شوي، حديثهما في نهاية "القطشة" كتير مهضوم. ـ

هالقطشة إنعملت من 35 سنة وكأنو ما تغيّر شي ..... أبشر و"إنجوي" ـ

الوضع النفسي حالياً

الرجاء القراءة بين السطور !!!! ـ

ومعـِك إجـِت وردة ملاني جروح

قلتلها عالعاشقك طـُلي

إنتي وعم طـُلي بتـِجيني الروح

ويا لوعتي إنتي وعم إتفلي

من شعر طليع حمدان

بلاغ رقم واحد....وأخير

ملاحظة: عضاريط جمع عضروط وما بتوحي بأي نكهة يعني متل لما بتقلو لبياع البوظة واحد كورنيه "عا" قشطة. لاء. وعافكرة العضروط هوي صعلوك وحتماً العضاريط هنـّي قرطة صعاليك

مقاومة الإنحلال: بيسان - القدس في البال - 1972- فيروز

غراميات وسياسة ؟؟؟ ما بتركب ...ـ

جو: آلو ... آلو ... ولك كيفك يا زلمة وينك مختفي ؟؟؟
أنا: أهلاااااااااااااان بـِ جو ... مشتقلك !!! أنا منيح ... والله عم بشتغل بآخر ما عمّر ربنا !!!
جو: شفناك هيداك النهار بالجميزة...كنا أنا و"سابين" عم نتعشى...شفناك قاعد إنت ووحدة أمّورة ... مين هاي وليه؟
أنا: إتعرفنا عا بعض بالشغل ... فا بتعرف أنا كيف !!! دغري لازم يصير في "خبز وملح" ... عزمتا عالعشا...وبصراحة عجبتني كتير
جو: أنا ما كتير شفتا منيح بس سابين قالت إنا كتير حلوة وجسما حلو كمان !!!
أنا: مبلا ... بتسبح كل يوم قال بالقليلة نص ساعة وبتلعب "سكواش" !!!
جو: شو مربى إنكليز هيئتا ؟؟
أنا: لا. بس عملت MBA بـِ شيكاغو وهونيك إتعلميت تلعب سكواش
جو: شووووووو .........
أنا: إيه إيه فهماني البنت ... بعدان عجبني إنو هيك بعدا عالطبيعة: ماكياج كتير خفيف، وبلا fond de teint وما أدراك ما هو الـ fond de teint؟؟؟ ... لون شعر طبيعي، ومش عاملي منخارا ولا نافخا شفافا ...
جو: وسيليكون ؟؟؟
أنا: يحرق دينك ملا جو !!! ما إتطلعت ................. مبلا سرقت نظرا عالسريع !!! ما بظني في سيليكون ... مش "ستيلا" أصلاً.
جو: شو بتعمل بالحياة طيّب ؟
أنا: قلتلك عاملي MBA وعم تشتغل مع الأمم المتحدة بمشاريع إعادة إعمار الجنوب
جو: أوكي ... وبرات الشغل عندا إهتمامات شي ؟
أنا: إيه بتحب الـ Jazz !!! ما زال عندا كل الـ Serie تبع Blue Note Jam Sessions
جو: شوووووو .... Melomane الإخت !!!
أنا: عا تقيل ....
جو: يخرب زوقك وين بتلاقيهن هيك نسوان ؟؟؟
أنا: شايف ..... بس ....هممممم
جو: بس ؟؟؟ بس ؟؟؟ بس شو ؟؟؟ في بس ؟؟؟
أنا: ولك روق يا زلمي ... إيه في بس ... طلعت بتحب الحياة !!!!
جو: شو عم تحكي ؟؟؟
أنا: متل ما عم تسمع ....
جو: يحرق سماك عا هالخبرية
أنا: عجبك ملا فقسي !!!
جو: شو رح تعمل طيب ؟؟
أنا: شو بدي أعمل ... خلص إنسيا ...
جو: ولك معقول راسك إنتا كمان ... بتطـّير وحدة هيك من إيدك ... طيب ما خففلي من سياستك كمان إنتا !!!
أنا: مش قادر يا خيي ... مش قادر ... هالمحوّر تبع الشر هالكني
جو: هلق إنتي بمحوّر الشر ؟؟؟
أنا: إيه منك عارف ؟؟؟ وبقوى الظلام كمان
جو: إنتي قوى ظلام ؟؟؟؟؟؟؟
أنا: أكيد ... شو بيك دخلك ؟؟
جو: والله مش عارف ...
أنا: إيه "الظلام" عليكم ورحمة الله وبركاته إزا هيك .........

الغنية: غنية عاطفية
العم بغـّني: خالد الهبر
Quotable Quote: يا إختي القصة كبرت ما عاد فيي حـِبّ ... قصة وعي سياسي مش قادر إني حـِبّ ...حُبي هوي الجماهير وغرامي القضية ... صيري إنتي الجماهير والفئات الشعبية ... تا إكتبلك غنية ... غنية عاطفية ...

12 Variations sur le thème "Kiss Ekhta"

ENJOY !!!