بيني وبين إميلي وراني

إميلي: ما أجمل ملقى المشتاق/ ويدّي تلامس يدّك/ الهيئة هيي عينا عليك/ سبقتني وقعدت حدك

أنا: الهيئة المشتاقين كتار/ والحب عليي جاني / هيي قعدت أول مَيل / إقعدي عالمَيل التاني

إميلي:هيي شكلا رزيلة / عشقانة وعندا حيلة / مش متلي بغرق بشبر/ وزياراتي قليلة

راني: إنتِ بميل وهيّي بميل / ما رح يروي الإشتياق / رح تبقوا تلاتة بهالليل / وما نعرف مين العشّاق

إميلي: والله هو محيّرني/ و بحكيو ما مقنعني/ شاككها جنبو بهالليل/ مضيّعها و مضيّعني

أنا: مقعّد وحدة عا حِدا / والتاني إتغنِّج عالهَدى / وراني يتفرّج مبسوط / الله لا يضيّع حَدا

راني: لا تضيعي ولا تحتاري/ ولا تزعلي أو تغاري/ كفّي صوبي بهالليل/ وأنا بفضّيلك داري

أنا: أوعا تفضّي وتعبّي / الليلة الحلوين بعِبّي / إتفرج من بعيد لبعيد / خلينا نضلنا صحبة

راني: قبل ما إنت تعلّقها/ ولمسة منّك تحرقها/ راني عم يتفرّج مبسوط/ عارف كيف بيسرقها

إميلي: غيراني و قلبي دايب/ و بعدو ما في حبايب/ بس القصة راسو كبير/ جهلان و شعرو شايب

راني: عبّك قد ما هوّي وسيع/ الحلوين بقلبو بتضيع/ خلّي الصحبة عا جنب/ وبطّل من هالحكي تبيع

أنا: الحلوين السكروا منّي / غرامن منو منّة / إن لحقوا وفاتوا عا عبّي / ما فيك تسرقلي هنّي

إميلي: ابن الأشقر ولعها/ مش عارف علق مع مين/ صاحبنا ما بيقبلها/ تسرق من ايدو الحلوين

راني: عندي أنا كبير القلب/ قرّبي ضيعي بكتر الحبّ/ مين بيزعل عالختيار/ وشايف حدّو أحلا شبّ

إميلي: نبيداتك خير الموسم/ و شفافك اطيب مبسم/ بس نبيدات الختيار/ هوانا صوبا نسّم

أنا: لا تكون محسبني كبـِرت / أو إني ختيار صرت / نبيداتي من أطيب كَرم / ومن شفاف الحلوين إسكِرت

راني: مش جايي إخلف عشّاق/ وأوعا تفكّروني سرّاق/ بسّ تعلّق فيك اتنين/ هاي عيب وقلّة أخلاق

أنا: غرامن بدو طولة باع / لا بينشرى ولا بينباع / إنشالله لو كانو مية / ما في قد قلبي بـِساع

إميلي: و لــــك يا ابن بيروت!!! ابن الأشقر موهوب كتير ما تقللو كتير كرمالي

أنا: هالشبّ القلبي إرتحلو/ معو الردات بتَحلو / لكن من درب الحلوين / مش ممكن إني زحلو

راني: محسوبك دايماً سكران/ والليلة منّك غيران/ رح تسهر مع الحلوين/ وأنا تارككن نعسان

راني: نبيد اللي بيعتق بيطيب/ وأحلى شمس عم بتغيب/ وما في أحلى من العمر/ عم يمضى بقرب الحبيب

إميلي: راني ما شالله فنان/ جوّعنا و نايم شبعان/ ريّتا دروبك ما توصل/ الا ع القلب الحرزان