مقاومة الإنحلال: في ذكرى عاصي الرحباني

إذا بدي نقّي أحلى قطعة موسيقى لَ هل الموسيقار العبقري بتكون هاي من أوبريت الإسوارة ... من أجمل الهارموني وأبدع التوزيع الموسيقي ....ـ

الله يرحم ترابك....لو بتعرف بس مستوى الوظوظة بالتلحين اليوم!!!!ـ

"هنيأً "فيكن كلكن

الموسيقى الخلفية من ألبوم شربل روحانا الجديد

Hand Made

والمعزوفة إسما "زفاف" ..... فـَ هنيأً للحديثاً مجوّزين وعقبال العايزين و ....هنيأً للبنان

الراعي حـَكـَم كرمستان

قولولا لَ ستّ الحسن
الراعي حكم كرمستان
يا حلوة لا تنغشي ...ما كلن كانوا رعيان

قولولا لَ ستّ الحسن
المجّوز عم بـِ نوح
يندهنا وياخدنا اللحن
بهالصوت المبحوح
قولولا الراعي الطيّوب
مدودخ ماشي بالمقلوب
مش سكران من المشروب
من لفتة عينيك سكران

من مسرحية "حكم الرعيان" لمنصور الرحباني

مبروك يا إخوان ... إنحلت

متى ما فاتوا العرب بالدّق...خلص... ما حدا يعتل همّ...لأنو محلولة

من مسرحية الأخوين رحباني "المؤامرة مستمرة" 1986

نتفة غزل

فستانِك خصرو عالي
وصدرو مفتوح
وكل ما بلوح قبالي
قلبي بلوح

مسموحـِك ما بيتخطـّى
الكحلة والميل
والمش مسموح مغطى
خلف المنديل
إنشالله تزبط شي خطة
المنديل تشيل
ونام وآخدلي غطة عالمش مسموح

---

شعرِك غافي عا إمو
عتـّلني همّ
وفستناك فتحة كمـّو
بتنقـّط سمّ
هوي وملبوس بضمـّو
ومن بعد الضمّ
برجع عالتخت بشمـّو
هوي ومشلوح

---

حالف لمـّا بلاقيكي
إن جاعو الأرواح
مش تفاحة بطعميكي
جنينة تفاح !!!ـ
ولو يا حلوة داعيكي
مهندس مسـّاح
ما بخـّلي مطرح فيكي
منـّو ممسوح

من شعر موسى زغيب

لا يعوّل عليه

بالإذن من إبن عربي ومن جمال كمان

يعوّل عليه

هيدا شبّ يعوّل عليه

من الأرشيف .... ومن وحي هالأوضاع

العم يحكي إسمو عبدالله النبوط وهو من مسرح الساعة عشرة يلي كانت أهم فرقة مسرحية بالسبعينات.ـ
الحديث عن أحداث عين الرمانة والشياح بالـ 75ـ
أيضاً وأيضاً الحديث من 33 سنة بس مدري لي يا أخي ما حدا عم يتعلم شي من هالتاريخ
كلنا شاطرين بالـ Math أجلكن وما منقلل عقلنا عالتاريخ لأنو التاريخ ما بيطعمي خبز!!!!ـ

إسمعولي هالقطشة: وفد ...وفد

كنت حابب علـّق على كل هالموفدين والوفود يلي أتحفونا بوجودن وبتطميناتن إنو "ولا يهمكن" رح يكون في رئيس وبالمهلة الدستورية كمان....وكان كلو كلام بكلام فا حابب إهديكن هالقطشة من مسرحية "يعيش يعيش" للأخوين رحباني
وكمان حابب إهدي هالقطشة لكل يلي "مجهزين" البروايز وناطرين مين بدو يكون الرئيس تا دغري يعلقوا الصور .... الدني مع الواقف ...ولو كان ......ـ

Quotable Quote:
الجوقة: ويلي سلاحو ظاهر يا جناب الشاويش ؟ـ
الشاويش : يلي سلاحو ظاهر ....ما بدو تفتيش

هالحديث صار من 35 سنة ...بشرفي .... يلعن الكازب.... وبشرفي ما تغيّر شي .... ولشو التغيير!!!!!ـ

قبل أن ...... ـ

الموسيقى الخلفية إسما "غنج" لمارسيل خليفة من ألبوم"caress"

من دهب !!!!!!!!!!!ـ

الموسيقى الخلفية إسما "قبل الضهر" من تأليف علي نصار موجودة بألبوم تطبيع

لعـيونـِك

الموسيقى الخلفية إسما Tagada Dance لتوفيق فروخ من ألبوم Ali On Broadway

سكر بنات وشـِعـِر للشـَعر

السلام عليكم. ما بظني بكون عم بفضح أسرار إذا قلتلكن إنو 99.93% من الشبيبة يلي حضرو فيلم سكر بنات صار معن حالات (حتماً) من "التريُّل" الشديد بس شافو الست فوق بالصورة. حتى داعيكم يلي مصاب بنشاف بالريق إلو فترة أحس ببعض عوارض التريـُّل يلي سرعان ما تحوّلت إلى همدرة لقصيدة كنت أعرفا من زمان وما كنت مقدرلو ياها لشاعري المفضل والأهضم أسعد سعيد إلا لما حضرت الفيلم و"صـُعقت" لما قصّولا شعرا. وصرلي جمعة هالقصيدة ما عم بتحّل عني فا رح حطّا هون وإتركا بركي هيي بتذوق وبتتركني ....ـ

شو عمـِلت مع حلاق شعرِك يا ترى
تا قصّر وقصّ وعـِمـِل هالمجزرة

شَعرِك الكتبتو قصايد تـِنقرى
بعطر القناني مش بحبر المحبرة

وكانت بطولو الريح هيي وطايرة
إتضييع وما تعرف لوين مسافرة

خصلاتك العليهن مقص إفترى
عمرن عُمر حبي إلـِك يا مغندرة

مربّـيهن وبعرف أساميهن منيح
وقاطع بإيدي لكل شعرة تذكرة

أحاديث من وحي هالوضع

(1)
قالتلي:
- ما بظني إنك بتحبني !!!
- كيف يا حياتي، معقول ، شو هالحكي؟ بحبك ونص .... وزايد واحد كمان
- ما أسألك !!!
-----------------------------------------------------------------------

(2)
- يا إمي ما صار لازم تفكر ترجع تتجوّز ؟ أمتين مفكر تتجوّز؟
- يلا بعد شي تلتين الساعة ...
- كيف ؟
- ما مختلفين عالنصاب ؟
- النصيب؟
- لاه يا Mom ... النصاب ... النصاب
- طفي هالكمبيوتر وقوم شراب معي فنجان قهوة ...
- بدنا ياها توافقية بعدين... بلا زغرة بمقامك ...
- ما تكون متكل عليي بشي مبادرة ؟؟؟
- العوزُ بالله ... بيعرفوا فيا الأميركان بتطلع طبختنا بحص
- سكبلي قهوة سكوب
-------------------------------------------------------------------------

(3)
- ليك، إذا ما صار في نصاب شو بيعملو ؟
- بياخدو Viagra !!!
- أياهن؟؟ جامـِعتنا وللا جامعتن ؟؟
- شو فارقا ما رح تاكول الخازوق عالميلتين ... آخدين فياغرا عم قلك ... في حدا رح ينقرط !!!
- مين ؟
- مين قولك ؟ (إختك ما أهبلك ... قلتلو بقلبي)

خلصنا، ولكن ... ـ

لَ يلي منكن بيعرفو الحقير صاحب هذه المدوّنة شخصياً ... بيعرفوا إنو هوي مُطـَّلق منذ حوالي سنة و"نيف"
فعلياً تم الإنفصال من سنة ونص إنما مبدئياً وعلى الورق مبارح من يومين تا "أخلي سبيل الموقوفين" ...
وكنت مقرر إنو هالمرحلة من حياتي صارت ورايي وإنو ما رح فكـّر إلا بالإيام الجايي وإتعلـّم من الأيام اللي مرقت ... بس لما قريت السبب اللي إتكلت عليه المحكمة الروحية لإبطال الزواج حسيـّت بمرارة مصحوبة بكتير كتير من السخرية ....

تا نحطّ الأمور شوي بنصابا كان القرار بالإنفصال متبادل وإعذروني عن عدم ذكر الأسباب الحقيقية (ولا ما خِنِت متل ما بعض الخـُبَسا لتلتوا وهيي كمان ما خانت) لأنو إتفقنا إنو إتضل الأسباب الحقيقية بيناتنا وبالفعل ضلّت لحديت هلق بيناتنا وأنا ما رح غيّر بالإتفاق ... إتوافقنا وترافقنا وكمان إتوافقنا وتفارقنا .......

بس لا ... بالقانون الكنسي ما فيكن تتوافقوا تا تتفارقو !!! لازم واحد من الشريكين يتشكى عالتاني وإلا ما بتصير !!!
لما خبـّروني هالـ"بلوتيكا" دغري قلتلن أنا ما بدي إشتكي عا حدا خليون هني يشتكوا... اكيد جماعتي طارو عقلاتن بس ما تركنا مجال للنقاش ...

فا إتقدم المحامين تبع ال "ex" بدعوى ضد حضرة جنابي لقاضي بالمحكمة الروحية وحكملن جنابو وأتحفوني بالسبب المقدم: (الفقرة التالية مأخوذة حرفياً من الدعوى)

حصل التعارف بين المتداعيين بحكم متابعتهما لتخصصهما الجامعي في الولايات المتحدة الأميركية وقد نشأت علاقة صداقة بينهما تخللتها الكثير من فترات الإنقطاع لأسباب تتعلق بوضع كل منهما الخاص.
لم يكن المـُستدعى ضده (يعني أنا) يخفي خلال فترة التعارف رأيه الخاص بالزواج وقد تأثر بالعادات والتربية والأفكار التحررية السائدة في الولايات المتحدة الأميركية حيث تابع تخصصه الجامعي، فالزواج بالنسبة إليه عقد كسائر العقود يتوقف إستمراره على نجاح الحياة المشتركة ويدوم بدوام التفاهم والإنسجام بين الزوجين من هنا كان الدافع إلى التلجئة من قبله. (ما بعرف شو يعني تلجئة وما بدي أعرف)

عا فكرا ما حدا منن سألني شي بهالخصوص قبل ما يقدمو الدعوى فكنت متفاجىء بهالسبب ومتل ما قلت حسّيت بمرارة لِحقتا كتير سخرية وقررت إبعتلو مكتوب للمحامي تا "صححلو شوي بالمعلومات" عا إساس إنو إعتبر الأفكار التحررية والعادات والتربية جبتون من أمريكا فا كتبتلو قلو إن وحياتك ما نطرت تا روح عا أميركا منشان الأفكار التحررية والعادات اللوقة وإنو أهلي كفـّوا ووفـّوا بالأفكار التحررية وأنا بعدني بلبنان وكنت بعدني عالـ "cerelac" أجّلـَّك ... وإنو جدي عطاني كتاب "كفر وإيمان" لخليل روكز وكنت بعدني بالـ" Quatrième" وإنو إيه مظبوط الزواج بالنسبة لإلي مش عقد ... بل شغلي أعمق من هيك بكتير... لأنو إذا بدي إستأجر سيارة بدا عقد أو جيب عامل أجنبي بدا عقد ... بس تا شارك حدن بحياتي بدا أكبر وأعمق من عقد ... وختمت المكتوب بقصيدة من كتاب كفر وإيمان إسما "قالو أنا كافر"

ما بعت المكتوب ...