Tuesday, January 04, 2011

بيني وبين "أميلي"ـ

من شي يومين زمان...من بعد ما سرّبت عالبيت بعد سهرة كتير طويلة...فتحت تويتر تا شوف شو في آخر مستجدات...وقبل ما نام "كبيّت" هالبيت الشعر ونطرت تا شوف إذا في حدا من السهرانين برّد:ـ


هالويسكي مش مرغوبة / ولا هيي من مطلوبي / إتعوّدت إسكر من حسنِك / ومش رحّ غيّر مشروبي

مرقلو شي نص ساعة وإذ بلاقي هالردة من إميلي

هيدي الويسكي ما بتنحب / لولا حدي احلا شب / يمكن لو كنت بقربي / كان الويسكي بدا كب

فا جاوبتا عالسريع أنا:ـ
الويسكي أوعيك تحبي / شيلي القنينة وكبّي / يمكن لو كنتي بقربي / تا خبيكي بعبّي

وكانت صارت الساعة شي تلاتة الصبح، فنمت. وعيت الصبح لقيتا كاتبة:ـ

هالشب ال كلو رقة / الليلة نقصتو الدقة / ع عبّو فكر رح فوت / فاتحلي عبّو شقة

مدري ليه فتحت معي القريحة "عالريق"، فبلشت إكتوب:ـ

رقة ودقة مش ناقصين / جننت عقول ملايين / إنكنك مش رح بتفوتي / زيحي من درب الحلوين


قبلـِك حبوا يفوتوا كتار / بس الشقة مسكونة / وهلق لِم راحوا الزوّار / لا تتغنج يا عيوني


بعـِبّي فتحتلـِك شقة / فرشتا بذوق ورقة / حطي راسك عا قلبي / وإنطربي عا صوت الدقـّة

وختمتلا ياها ببيت عتابا (من أرشيف الزغلول):ـ

يا حلوة بإيديك إسقيني ويسكتي / لئلا يصيبني عارض وسكتة / وعا صدري غمّيضي عيونيك واسكتي / السكوت كتير أحلى من الجواب

فجاوبت:ـ

سألت عَنك قالو شو بكي / و قالو دروبَك كلّا ملبكي / يمكن كلامن صح ويمكن حكي / العبرة الليلة عندك بالجواب 

حاطط ع كتفو نجمة / وعَ قلبي عامل هجمة / عبّو بعدو قيد الدرس / بدي حيلو ع اللجنة

حلوات الوقفوا بالصف / ع بوابك ما بيعنوني / لما سمعتك قلبي هف / اوعا عيونك ينسوني

قلبك تسلم دقاتو / دقة و رقة عاداتو / عازمني ت اتسمع / دبت بخفة همساتو

وللحديث صلة ...ـ

4 comments:

linalone said...

صرلي زمان ما علقت تحت اسم لينالون. بتذكرا يا زياد. كانت نقاقة من الدرجة الأولى. زجلكم تنيناتكم كثير حلو.

I Emilie :) said...

انا صراحة مش ضليعة شعر و زجل و ما بتابعن ما بعرف كيف لقيت حالي عم رد عليك! بالنسبة للأبيات يللي كتبتلك ياها، انا ضمنتها تخمين. بما انك ما لقطو يعني تخميني خاطئ/ يرجى المحاولة لاحقا!!! شكرا

sewa mobil said...

Very nice article, thanks.

Khawwta said...

reading "zajal" again is so inspiring :)